პარტია "საქართველოს გზის" საპატიო თავმჯდომარის სალომე ზურაბიშვილის განცხადებით, იგი საპრეზიდენტო კანდიდატად დარეგისტრირებისთვის განაცხადს ცენტრალურ საარჩევნო კომისიაში ორშაბათს შეიტანს.
როგორც ზურაბიშვილმა დღეს გამართულ პრესკონფერენციაზე აღნიშნა, მომდევნო კვირის განმავლობაში იგი სხვადასხვა რანგის პოლიტიკურ ლიდერებთან შეხვედრებს გამართავს და უახლოეს მომავალში მისი საარჩევნო შტაბის დაკომპლექტებაც დაიწყება.
"პირველ რიგში მინდა პრეემიერის განცხადებას მივესალმო და მივესალმო მის განცხადებაში ჩემს მიმართ გამოთქმულ კეთილ სურვილებს, რაც ძალიან მნიშვნელოვანია. ცხადია, რომ ჩემი კანდიდატურის თაობაზე გადაწყვეტილება მიღებულ იქნება ცესკო-ს მიერ. სარეგისტრაციოდ ჩემს კანდიდატურას ორშაბათს შევიტან და ცესკო მიიღებს გადაწყვეტილებას. მე კარგად შევისწავლე კონსტიტუცია და მე მგონი ყველას აქვს საშუალება კონსტიტუციის წაკითხვისა და ნახოს რამდენად მარტივია და რამდენად მარტივად შეუძლია ცესკო-მ კონსტიტუცია მხეველობაში მიიღოს. მე არც რამე დათმობას, არც გამოსწორებას, არც რომელიმე კანონის შეცვლას და არც ჩემზე გამოჭრილ რამე კანონს ვეძებ, არც გამონაკლისის და პრივილეგირებულ მდგომარეობაში ჩაყენების დაშვებას ვითხოვ, მე მხოლოდ კანონით დაწესებული რეგულაციების ბოლომდე შესრულებას ვითხოვ და ეს კიდევ ერთხელ ვიტყვი, არის ძალიან მარტივი,"- განაცხადა სალომე ზურაბიშვილმა.
შეგახსენებთ, რომ საქართველოს პრემიერ-მინისტრმა ბიძინა ივანიშვილმა საქართველოს პრეზიდენტობის მსურველის სალომე ზურაბიშვილის ღია წერილს დღეს ღია წერილითვე უპასუხა.
ივანიშვილის პრესსამსახურის მიერ გავრცელებული წერილის თანახმად, საქართველოს პრემიერ-მინისტრი კიდევ ერთხელ მივმართავს და მოუწოდებს ყველა სახელმწიფო ორგანოსა და თანამდებობის პირს, რათა მოქალაქეების პოლიტიკური უფლებების თაობაზე გადაწყვეტილებების მიღების დროს იხელმძღვანელონ მხოლოდ და მხოლოდ კონსტიტუციით, კანონებით და საკუთარი შინაგანი რწმენით.