ევროპის საბჭო სოფელ ჭელაში განვითარებულ პროცესებს თვალყურს ადევნებს. ამის შესახებ ჟურნალისტებთან საქართველოში ევროპის საბჭოს ოფისის ხელმძღვანელმა კატერინა ბოლონეზემ განაცხადა.
მისივე განმარტებით, მინარეთის დემონტაჟთან დაკავშირებით ინფორმაციას ევროპელ კოლეგებს მიაწვდის.
,,მინარეთთან დაკავშირებულ მოვლენებს ვიცნობ და როგორც ევროპის საბჭოს ოფისის ხელმძღვანელი ამის შესახებ ინფორმაციას მივაწვდი ჩემს კოლეგებს სტრასბურგში. ჩვენ ყურადებით ვადევნებთ თვალს მოვლენების განვითარებას. ცხადია გარკვეული კითხვები ჩნდება როდესაც ასეთ დრამატულ და შოკისმომგვრელ შემთხვევას აქვს ადგილი, მაგრამ ჩემი კომპეტენცია არ არის დარღვევებზე ლაპარაკი. ხალხს ამის განხილვა ადგილობრივ, ეროვნულ დონზე შეუძლია", _განაცხადა კატერინა ბოლონეზემ.
შეგახსენებთ, რომ ადიგენის რაიონის სოფელ ჭელაში მუსლიმთა სამლოცველოს მინარეთის დემონტაჟი 26 აგვისტოს მოხდა, რომელიც ფინანსთა სამინისტროს შემოსავლების სამსახურმა მინარეთის რკინის კონსტრუქციის იმპორტირებისას საბაჟო პროცედურების დარღვევით ახსნა. მინარეთის დემონტაჟს საქართველოში მცხოვრები მუსლიმი მოსახლეობის პროტესტი მოჰყვა და აჭარის მეჩეთთან სხვადასხვა რეგიონიდან ჩასულმა ათასობით მუსლიმმა საპროტესტო აქცია გამართა. საბოლოოდ, აჭარის ავტონომიური რესპუბლიკის მთავრობის თავმჯდომარის არჩილ ხაბაძის შუამდგომლობით, ჭელაში მინარეთის დაბრუნება დღეს საღამოს 19:00 საათისთვის გადაწყდა. ამ წუთებში ადგილობრივ მართლმადიდებელ მოსახლეობას ახალციხიდან ჭელასკენ მიმავალი ცენტრალური მაგისტრალი აქვს გადაკეტილი. მათი თქმით, ისინი მინარეთის აღდგენას არ დაუშვებენ. აღნიშნულ საპროტესტო აქციაში სასულიერო პირებიც მონაწილეობენ და მომიტინგეთა მოთხოვნებს სრულად იზიარებენ.
