საქართველოში ევროსაბჭოს ოფისის წარმომადგენლის კატერინა ბოლონეზეს განცხადებით, "ადიგენის რაიონის სოფელ ჭელაში მუსლიმთა სამლოცველოს მინარეთის დემონტაჟი დრამატული და შოკისმომგვრელი ფაქტია".
"მინარეთთან დაკავშირებულ მოვლენებს ვიცნობ და როგორც ევროპის ოფისის ხელმძღვანელი, ინფორმაციას მივაწვდი ჩემს კოლეგებს სტრასბურგში. ჩვენ ყურადღებით ვადევნებთ თვალს მოვლენების განვითარებას. ცხადია, გარკვეული კითხვები რჩება როდესაც დრამატულ და შოკისმომგვრელ შემთხვევას აქვს ადგილი, მაგრამ ჩემს კომპეტენციას არ წარმოადგენს რამე დარღვევებზე ლაპარაკი. ამის განხილვა ხალხს ადგილობრივ, ეროვნულ დონეზე შეუძლია,"- განაცხადა კატერინა ბოლონეზემ.
ცნობისთვის, ადიგენის რაიონის სოფელ ჭელაში მუსლიმთა სამლოცველოს მინარეთის დემონტაჟი 26 აგვისტოს მოხდა. აღნიშნული გადაწყვეტილება ფინანსთა სამინისტროს შემოსავლების სამსახურმა მინარეთის რკინის კონსტრუქციის იმპორტირებისას საბაჟო პროცედურების დარღვევით ახსნა. მინარეთის დემონტაჟს საქართველოში მცხოვრები მუსლიმი მოსახლეობის პროტესტი მოჰყვა და აჭარის მეჩეთთან სხვადასხვა რეგიონიდან ჩასულმა ათასობით მუსლიმმა საპროტესტო აქცია გამართა. საბოლოოდ, აჭარის ავტონომიური რესპუბლიკის მთავრობის თავმჯდომარის არჩილ ხაბაძის შუამდგომლობით, ჭელაში მინარეთის დაბრუნება დღეს საღამოს 19:00 საათისთვის გადაწყდა. ამ წუთებში ადგილობრივ მართლმადიდებელ მოსახლეობას ახალციხიდან ჭელასკენ მიმავალი ცენტრალური მაგისტრალი აქვს გადაკეტილი. მათი თქმით, ისინი მინარეთის აღდგენას არ დაუშვებენ. აღნიშნულ საპროტესტო აქციაში სასულიერო პირებიც მონაწილეობენ და მომიტინგეთა მოთხოვნებს სრულად იზიარებენ.