"მინარეთის დემონტაჟის ინიციატორს იმდენი ინტელექტი უნდა ჰქონდეს, რომ ბოძსა და მინარეთს შორის განსხვავებას ხედავდეს."- ამის შესახებ საქართველოს უმაღლესი საკანონმდებლო ორგანოს უმრავლესობის წევრმა გედევან ფოფხაძემ 26 აგვისტოს ადიგენის რაიონის სოფელ ჭელაში მუსლიმთა სამლოცველოს მინარეთის დემონტაჟის ფაქტის კომენტირებისას ისაუბრა.
"ვინც ეს პროცედურა ასეთი ფორმით განახორციელა, იმას უნდა ესმოდეს, რომ კანონის ფორმალური გაგების გარდა ელემენტარულად იმდენი ინტელექტი უნდა ჰქონდეს, რომ ხვდებოდეს რა ხდება სამყაროში მის გარშემო. უნდა ხვდებოდეს, რომ ეს არ არის ბოძი და ესაა მინარეთი. ამ შემთხვევაში უნდა ხედავდეს განსხვავებას სამშენებლო მასალასა და რელიგიურ ნების გამომხატველ სიმბოლოებს შორის. ამ ადამიანების ინტელექტი მაიც ცოტა დასაზუზტებელი არის და შესაბამისად, თუ ადამიანს პრობლემები აქვს ინტელექტთან, ასეთი ვალდებულებები არ უნდა აჰკიდოს სახელმწიფოს,"- განაცხადა გედევან ფოფხაძემ.
ცნობისთვის, ადიგენის რაიონის სოფელ ჭელაში მუსლიმთა სამლოცველოს მინარეთის დემონტაჟი 26 აგვისტოს მოხდა. აღნიშნული გადაწყვეტილება ფინანსთა სამინისტროს შემოსავლების სამსახურმა მინარეთის რკინის კონსტრუქციის იმპორტირებისას საბაჟო პროცედურების დარღვევით ახსნა. მინარეთის დემონტაჟს საქართველოში მცხოვრები მუსლიმი მოსახლეობის პროტესტი მოჰყვა და აჭარის მეჩეთთან სხვადასხვა რეგიონიდან ჩასულმა ათასობით მუსლიმმა საპროტესტო აქცია გამართა. საბოლოოდ, აჭარის ავტონომიური რესპუბლიკის მთავრობის თავმჯდომარის არჩილ ხაბაძის შუამდგომლობით, ჭელაში მინარეთის დაბრუნება დღეს საღამოს 19:00 საათისთვის გადაწყდა. ამ წუთებში ადგილობრივ მართლმადიდებელ მოსახლეობას ახალციხიდან ჭელასკენ მიმავალი ცენტრალური მაგისტრალი აქვს გადაკეტილი. მათი თქმით, ისინი მინარეთის აღდგენას არ დაუშვებენ. აღნიშნულ საპროტესტო აქციაში სასულიერო პირებიც მონაწილეობენ და მომიტინგეთა მოთხოვნებს სრულად იზიარებენ.
