სირიის ქალაქ დამასკოში 22 ქართველი იმყოფება. ამის შესახებ ინფორმაციას, ,,რუსთავი-2" ავრცელებს, რომელსაც ქართველები თავად დაუკავშირდნენ.
კურიერის ინფორმაციით, ქართველები საომარი მოქმედებების ზონის დატოვებას ვერ ახერხებენ და დახმარებას ითხოვენ.
მათი ინფორმაციით, დამასკოში საომარი მოქმედებები არ მიმდინარეობს, მაგრამ საფრთხე მაინც არსებობს.
,,საზღვრებია ჩაკეტილი და ვერ ვახერხებთ სირიის დატოვებას. გვინდა ერთი საათით მაინც გაგვიხსნან საზღვარი და გადავიდეთ თურქეთში. აფეთქების ხმა ისმის და გვეშინია. ერთადერთი გზა არის ბეირუთი სტამბულში ჩასასვლელად. ბეირუთში ჩასავლელად კი ზოგიერთს თანხა არ აქვს, რადგან ძალიან ძვირი ჯდება", _განაცხადა ,,რუსთავი-2"-თან საუბარში დამასკოში მყოფმა რიტა ნალბანდიანმა.
ეგვიპტეში საქართველოს კონსულის მოვალეობის შემსრულებელმა ,,კურიერთან" საუბარში აღნიშნა, რომ საქართველოს მოქალაქეებს უკვე დაუკავშირდა და ესაუბრა.
,,ჩვენს ვესაუბრეთ მათ და დაჟინებითი რეკომენდაცია მივეცით, რომ სასწრაფოდ გაემგზავრონ ლიბანის საზღვრისკენ, რომელიც არის უახლოესი წერტილი ბეირუთში გადასასვლელად, რათა იქიდან გამოემგზავრონ სახლში", _ _განაცხადა დავით ნამორაშვილმა და აღნიშნა, რომ საკონსულო საჭიროების შემთხვევაში შესაბამის დახმარებას გაუწევს ქართველებს.
შეგახსენებთ, რომ საგარეო საქმეთა სამინისტროს ინფორმაციით სირიაში არცერთი ქართველი არ იმყოფებოდა. ამის შესახებ საგარეო უწყების პრესსამსახურის უფროსმა მარი ნარჩემაშვილმა გუშინ განაცხადა.
