სახალხო დამცველის ყოფილმა მოადგილემ სოფიო ხორგუანმა საქართველოს პრეზიდენტისადმი მიმართვა გაავრცელა. „ჯი-ეიჩ-ენი" მიმართვას უცვლელად გთავაზობთ:
„ბატონო პრეზიდენტო! ბატონო მიხეილ!
უახლოეს დღეებში თქვენ გამოაქვეყნებთ საქართველოს ეროვნული კომუნიკაციების კომისიის წევრობის მსურველთა სიას. ამ სიაში მეც ვიქნები, რადგან ვაკანსიის პირობების გაცნობის შემდეგ, გამიჩნდა სახელმწიფოსთვის ერთ-ერთ უმნიშვნელოვანეს სტრუქტურაში მუშაობის ჯანსაღი ამბიცია. კონკრეტულ ვადაში თქვენ მოგიწევთ იმ სამი კანდიდატურის შერჩევა, რომლებსაც საქართველოს პარლამენტს წარუდგენთ დასამტკიცებლად.
თქვენი არჩევანი, რა თქმა უნდა, უპირობოდ უნდა ამოდიოდეს სახელმწიფოებრივი ინტერესებიდან. მით უფრო, საქართველოს პრეზიდენტის ბოლო პერიოდის ყველა გამოსვლაში ხაზგასმითაა ნათქვამი ნეპოტიზმის, მერიტოკრატიის, „შენი" და „ჩემი" ინტერესებისა და ამ ინტერესების გამტარებელი კლანების დამღუპველობასა და ნეგატიურ გავლენაზე წარმატებული სამართლებრივი სახელმწიფოს მშენებლობის საქმეში.
ჩემი განაცხადი, შეგიძლიათ მიიღოთ ერთგვარ გამოწვევად. ეს იქნება თქვენი, როგორც პრეზიდენტის ობიექტურობისა და მიუკერძოებლობის ტესტი - რამდენად შეგიძლიათ გააკეთოთ კონკრეტულ მოცემულობაში სახელმწიფოებრივად ოპტიმალური არჩევანი. ჩემს ზურგს უკან არ დგას არცერთი ბიზნეს-წრე და პოლიტიკური ჯგუფი. არ მყავს არაოფიციალური პროტექტორები, შესაბამისად, არ იქნება არაოფიციალური ზარები და საუბრები დახურულ კარს მიღმა.
ბატონო მიხეილ!
თქვენ გაქვთ საკმარისი ინფორმაცია და წარმოდგენა ჩემზე. ალბათ, გაგაჩნიათ სუბიექტური განწყობაც. განსხვავებული პოლიტიკური შეხედულების მიუხედავად, იმას ვერ უარყოფთ, რომ მე, როგორც საჯარო პირი, ყოველთვის ღიად გამოთქვამდი აზრს და, არც ისე იშვიათად, ვიღებდი არაპოპულარულ გადაწყვეტილებებსაც, ისევ და ისევ, კონკრეტულ მოცემულობაში საზოგადოებრივი და სახელმწიფოებრივი ინტერესებიდან გამომდინარე.
მე, სოფიო ხორგუანი, ყოველთვის ვცდილობდი, მართალი ვყოფილიყავი კანონის, ღმერთის და სახელმწიფოს წინაშე. ამიტომ, იმედს ვიტოვებ, რომ თქვენს მიერ პარლამენტისთვის წარდგენილ სამ კანდიდატს შორის ერთ-ერთი ვიქნები მეც. იმის გათვალისწინებით, რომ ეროვნული კომუნიკაციების კომისია სამი მთავარი მიმართულებით მუშაობს, როგორიცაა - მომხმარებელთა უფლებების დაცვა, მომსახურების ხელმისაწვდომობის გაზრდა და კონკურენტუნარიანი გარემოს ხელშეწყობა, ჩემი განათლება, კომპეტენცია და სამუშაო გამოცდილება მაძლევს ამ მიმართულებით სასარგებლო საქმის რეალურად კეთების შესაძლებლობას.
და ბოლოს! როგორც აფხაზეთიდან დევნილი, რომელსაც სახლში დაბრუნება უნდა, საჯარო სივრცეში მოვხვდი ერთადერთი მიზეზით - გაერთიანებული საქართველოს მშენებლობის პროცესში ჩემი წილი აგური დავდო საკუთარი შესაძლებლობების სწორად პოზიციონირებით და მაქსიმალურად გამოყენებით.
სოფიო ხორგუანი
28 აგვისტო, 2013 წელი"
შეგახსენებთ, რომ კონკურსი ეროვნული კომუნიკაციბის კომისიის წევრის შესარჩევად სააკაშვილმა 24 ივლისს გამოაცხადა, მას შემდეგ რაც კომისიის წევრმა და ყოფილმა თავმჯდომარემ ირაკლი ჩიქოვანმა თანამდებობა დატოვა. ჩვენი ინფორმაციით კონკურსში მონაწილეობას იღებს 17 მსურველი, რომელთა ვინაობა ამ ეტაპზე გასაიდუმლოებულია. პარლამენტს ამ დღეებში სააკაშვილმა უნდა გადაუგზავნოს ჩვიდმეტიდან ამორჩეული მინიმუმ სამი კანდიდატურა დასამტკიცებლად", - ნათქვამია განცხადებაში. .