ზესტაფონის მუნიციპალიტეტის ოფიციალურ ვებ-გვერდზე კოალიცია "ქართული ოცნების" საპრეზიდენტო კანდიდატის გიორგი მარგველაშვილის წინასაარჩევნო შეხვედრის ამსახველი მასალა განთავსდა.
როგორც "ჯი-ეიჩ-ენს" ზესტაფონის გამგეობის ადმინისტრაციული სამსახურის უფროსმა ეკატერინე დუგლაძემ განუცხადა, აღნიშნული დარღვევა გამგეობის შესაბამისი სამსახურის თანამშრომლის გაუთვალისწინებელი შეცდომის გამო დაფიქსირდა.
"დღეს დასვენების დღეა და არ ვიყავით სამსახურში. ჩემმა ერთ-ერთმა თანამშრომელმა სახლიდან დადო ეს ინფორმაცია. არ გახსენებია, რომ კანონით განსაზღვრულ ვადაში მსგავსი ინფორმაციის გამგეობის ვებ-გვერდზე გაშუქება არ შეიძლებოდა და ამიტომ დაარღვია დღეს კანონი. ინფორმაცია უკვე წაშლილია,"- განაცხადა ეკატერინე დუგლაძემ.
"ჯი-ეიჩ-ენის" კითხვაზე, აღნიშნული თანამშრომელი რაიონში გიორგი მარგველაშვილის მიერ დღეს ჩატარებულ წინასაარჩევნო შეხვედრას პირადად ესწრებოდა თუ არა, ადმინისტრაციის ხელმძღვანელმა უპასუხა "რა მოხდა, შეცდომა მოუვიდა. ყველა სიახლე შუქდება ჩვენს ოფიციალურ ვებ-გვერდზე, მათ შორის ნინო ბურჯანაძის შეხვედრაც. მაინც და მაინც გიორგი მარგველაშვილზე რატომ აკეთებთ აქცენტს?!".
ზესტაფონის მუნიციპალიტეტის ოფიციალურ ვებ-გვერდზე დღეს გამოქვეყნებული ინფორმაციის ტექსტს "ჯი-ეიჩ-ენი" უცვლელად გთავაზობთ:
"დღეს, კოალიცია „ქართული ოცნების" პრეზიდენტობის კანდიდატი გიორგი მარგველაშვილი რაჭაში, ნიკორწმინდის ტაძარში მარიამობის სადღესასწაულო წირვას დაესწრო და საქართველოს მართლმადიდებელ მოსახლეობას ღვთისმშობლის მიძინების საუფლო დღესასწაული მიულოცა.
„მთელ საქართველოს, ქართველებს, რომლებიც არ არიან საქართველოში და იმყოფებიან საზღვარგარეთ, ყველა ოჯახს მინდა მივულოცო მარიამობის ბრწყინვალე დღესასწაურლი" - განაცხადა გიორგი მარგველაშვილმა
ნიკორწმინდის ტაძრის წინამძღოლმა მეუფე თორნიკემ გიორგი მარგველაშვილს წმინდა ნიკოლოზის ჭედური ხატი გადასცა,"- აღნიშნული იყო ზესტაფონის მუნიციპალიტეტის ოფიციალურ ვებ-გვერდზე გამოქვეყნებულ მასალაში.
აღსანიშნავია, რომ გიორგი მარგველაშვილის წინასაარჩევნო შეხვედრის ამსახველი მასალა ზესტაფონის მუნიციპალიტეტის გამგეობის ოფიციალური ვებ-გვერდიდან უკვე წაშალეს.