"ისეთი კეთილგანწყობა, რაც მე მხვდება ბოლო დღეებში ბათუმში, 2004 წლის შემდეგ არ მახსოვს. ძალიან მომწონს აქაურობა. ეს ტელევიზორში ნახა ერთმა კაცმა, ზოოპარკის დირექტორმა და ეტყობა არ მოეწონა და ერთ-ერთი გალიიდან გამოუშვა "ჩაცუცქული" ელემენტები, რომლებიც ჩამოვიდნენ გუშინ მთელი ბრიგადა,"- ამის შესახებ საქართველოს პრეზიდენტმა მიხეილ სააკაშვილმა ბათუმის პიაცაზე მისი დაცვის წევრებს და სასჯელაღსრულების დაწესებულებიდან პოლიტპატიმრის სტატუსით გათავისუფლებულ მელორ ვაჩნაძეს შორის გუშინ ღამით მომხდარი ინციდენტის კომენტირებისას ისაუბრა.
სააკაშვილის თქმით, "მას საფუძვლიანი ეჭვი აქვს, რომ აღნიშნულ ინციდენტში მონაწილე პირებს სასტუმროს ხარჯები აუნაზღაურეს და გარკვეული ”ჰონორარიც” გადაუხადეს, რათა მისთვის შეურაცხყოფა მიეყენებინათ".
"გადაუხადეს სასტუმროს ფული, "სამივლინებო ხარჯები", სასამართლო ხარჯები - 100 ლარი ღირს პრეზიდენტის შეურაცხყოფა. მაშინ, როდესაც რუსი დეპუტატის შეურაცხყოფისთვის თბილისში ერთ-ერთ ახალგაზრდას 1 000 ლარი გადაახდევინეს. აფხაზეთში ჩვენს წინააღმდეგ მებრძოლის წინააღმდეგ დინამოსთან 500 მეტრიდან დაშორებით პლაკატებით მდგომი ადამიანები 1 000 ლარით დააჯარიმეს,"- განაცხადა მიხეილ სააკაშვილმა.
მისივე თქმით, მიუხედავად მომხდარი ინციდენტისა, იგი კვლავაც აქტიურად გააგრძელებს საზოგადოებრივი თავშეყრის ადგილებში გადაადგილებას და ხალხთან შეხვედრებს.
"მე მინდა იმედი გავუცრუო ყველას, ყველგან ვივლი, ყველასთან ვიურთიერთებ, ყოველ საღამოს ვიჯდები ხალხში, მე პრობლემა არ მაქვს დაცვის თანამშრომლების გარეშე,"- აღნიშნა პრეზიდენტმა.
სააკაშვილის განცხადებით, "იმაზე, რომ გუშინ მოხდარი ფაქტი სახელმწიფო სტრუქტურების მიერ ორგანიზებული იყო, ისიც მეტყველებს, რომ ბათუმის ყველაზე ხალხმრავალი ადგილის მიმდებარე ტეიტორიაზე არც ერთი სამართალდამცველი არ იმყოფებოდა".
"ქვეყანას ბევრი ასეთი აქტიურობით, ქაოსით, არეულობის შექმნის მცდელობით პრობლემა ექმნება. იმიტომ, რომ ამას ყველაფერს აქვს კონკრეტული ფასი - გაჩერებული წარმოებები, დაკლებული შემოსავლები და უსაფრთხოების განცდის მოშლა საქართველოში. ეს არ უნდა დავუშვათ. გუშინ რაც მოხდა იქ - ჩემი თვალით ვნახე, რომ ხალხმა ისინი გააძევა იქიდან. ერთი პოლიციელი არ იყო გარშემო სპეციალურად. პრეზიდენტს თავი დავანებოთ, ხალხი ხომ იყო ბევრი?! ბათუმში ყველაზე ხალხმრავალ ადგილზე ერთი პოლიციელი არ იყო. ეს იმაზე მეტყველებს, რომ იყო სახელმწიფო როგანოების მიერ ორგანიზებული აქცია,"- აღნიშნა პრეზიდენტმა.
შეგახსენებთ, რომ გუშინ ღამით სასჯელაღსრულების დაწესებულებიდან პოლიტპატიმრის სტატუსით გათავისუფლებულმა მელორ ვაჩნაძემ ბათუმში მყოფ საქართველოს პრეზიდენტს სიტყვიერი შეურაცხყოფა მიაყენა, რის გამოც იგი ადმინისტრაციულ სამართალდარღვევათა კოდექსის 166-ე მუხლით გათვალისწინებული დანაშაულის ჩადენის ბრალდებით დააპატიმრეს, რაც წვრილმან ხულიგნობას გულისხმობს. აღნიშნულ საქმეზე ვაჩნაძის სასამართლო პროცესი დღეს გაიმართა და მას 100 ლარიანი ჯარიმის გადახდა დაეკისრა.
