საქართველოს პრეზიდენტის ადმინისტრაციის ხელმძღვანელის ანდრო ბარნოვის განცხადებით, გუშინ ღამით ბათუმის პიაცაზე სასჯელაღსრულების დაწესებულებიდან პოლიტპატიმრის სტატუსით გათავისუფლებული მელორ ვაჩნაძის მონაწლეობით მომხდარი ინციდენტი წინასწარ დაგეგმილი პროვოკაცია იყოს.
ბარნოვის თქმით, "პრეზიდენტის ადმინისტრაციას საფუძვლიანი ეჭვი აქვს, რომ აღნიშნულ ინციდენტში მონაწილე პირებს სასტუმროს ხარჯები აუნაზღაურეს და გარკვეული ჰონორარიც გადაუხადეს, რათა მიხეილ სააკაშვილისთვის შეურაცხყოფა მიეყენებინათ".
"ზუსტად ვიცი როგორი თბილი და უშუალო ატმოსფერო არის ხოლმე იქ როდესაც პრეზიდენტი მიდის, მიდის უამრავი ხალხი, ზოგს უბრალოდ გასაუბრება უნდა, ზოგს პრეზიდენტთან ფოტოს გადაღება, რეალურად ადგილზე, სკამზე დაჯდომის საშუალებას არ აძლევენ. თუ არ ვცდები, 2 დღის წინ ტელევიზიით სიუჟეტიც გავიდა და როგორც ჩვენთვის ცნობილია, ამ სიუჟეტმა გააღიზიანა ხელისუფლებაში მყოფი რამდენიმე კონკრეტული პირი, სასწრაფოდ მოიხმეს ვაჩნაძე. როგორც ვიცით, გადაუხადეს მას სასტუმროს ფული, მისცეს დამატებითი ანაზღაურებაც და დაავალეს იქ ჩასულიყო და არეულობა მოეწყო, რაც გააკეთა კიდევაც და სწორედ ამ ხელისუფლების მიერ ხელდასმით შეიძლება აიხსნას ის განსაკუთრებული თავგამოდება, რასაც ის გუშინ იჩენდა,"- განაცხადა ანდრო ბარნოვმა.
შეგახსენებთ, რომ გუშინ ღამით სასჯელაღსრულების დაწესებულებიდან პოლიტპატიმრის სტატუსით გათავისუფლებულმა მელორ ვაჩნაძემ ბათუმში მყოფ საქართველოს პრეზიდენტს სიტყვიერი შეურაცხყოფა მიაყენა, რს გამოც იგი ადმინისტრაციულ სამართალდარღვევათა კოდექსის 166-ე მუხლით გათვალისწინებული დანაშაულის ჩადენის ბრალდებით დააპატიმრეს, რაც წვრილმან ხულიგნობას გულისხმობს.
მელორ ვაჩნაძის სასამართლო პროცესი დღეს გაიმართება.
