ახალხიცის რაიონული სასამართლოს გადაწყვეტილებით, ადიგენის რაიონის სოფელ ჭელაში მუსლიმთა სამლოცველოს მინარეთის დემონტაჟის პროცესში განვითარებული მოვლენებისას დაკავებულ სამ მოქალაქეს, რომელთა მიმართაც სისხლის სამართლის საქმე იყო აღძრული, აღკვეთის ღონისძიების სახით 2 000 - 2 000 ლარის ოდენიბით გირაო შეეფარდათ.
რაინდ შანთაძის, ვახტანგ მარკოიძის და გენადი აბაშიძის სასამართლო პროცესი რამდენიმე წუთის წინ დასრულდა.
სასამართლომ პირველადი წარდგენისას აღკვეთის ღონისძიების შეფარდების საკითხზე ბრალდებულების მიმართ პროკურორის შუამდგომლობა განიხილა და ბრალდებულებისთვის გირაოს შეფარდების გადაწყვეტილება იქნა მიღებული.
აღნიშნული თანხა მათ 30 კალენდარული დღის ვადაში უნდა გადაიხადონ.
სამივე ბრალდებულს ახალგაზრდა იურისტთა ასოციაციის ადვოკატი რევაზ რევაზიშვილი და ნუგზარ სამარჯიშვილი იცავდნენ. ადვოკატებმა სასამართლოს ბრალდებულების აღკვეთის ღონისძიების გარეშე დატოვება სთხოვეს, თუმცა მოსამართლე გიორგი ლონდარიძემ მათი შუამდგომლობა არ დააკმაყოფილა.
აღნიშნულ საქმეზე შემდეგი პროცესი 2013 წლის 16 ოქტომბრისთვის ჩაინიშნა.
რაინდ შანთაძეს, ვახტანგ მარკოიძეს და გენადი აბაშიძეს ბრალი საქართველოს სისხლის სამართლის კოდექსის 353-ე მუხლის მე-2 ნაწილით გათვალისწინებული დანაშაულის ჩადენაში ედებათ, რაც დანაშაულის დამტკიცების შემთხვევაში 4-დან 7 წლამდე პატიმრობას გულისხმობს.
ცნობისთვის, ადიგენის რაიონის სოფელ ჭელაში გუშინ საღამოს მომხდარი ინციდენტისას დაკავებული ყველა პირი თავისუფალია. სამართალდამცველებისთვის წინააღმდეგობის გაწევის ბრალდებით დაპატიმრებული 21 პირიდან ნაწილი გუშინ საღამოსვე გაათავისუფლეს, ნაწილმა კი, გასული ღამე ახალციხის წინასწარი დაკავების იზოლატორში გაატარა. სოფელ ჭელაში მუსლიმთა სამლოცველოს მინარეთის დემონტაჟისას დაკავებულთაგან 6 პირს დღეს სასამართლომ ადმინისტრაციულ სამართალდარღვევათა კოდექსით გათვალისიწნებული დანაშაულის ჩადენის გამო 400 - 400 ლარიანი ჯარიმის გადახდა დააკისრა, 3 პირი კი, საქართველოს სისხლის სამართლის კოდექსის მუხლების დარღვევისათვის დღის ბოლოს გაასამართლეს, თუმცა ისინი წინასწარი დაკავების იზოლატორიდან სახელმწიფო ბრალმდებლის შუამდგომლობის საფუძველზე აღკვეთის ღონისძიების სახით გირაოს შეფარდებამდე გათავისუფლდნენ.
შეგახსენებთ, რომ სოფელ ჭელას მინარეთის დემონტაჟის გადაწყვეტილება ადიგენის მუნიციპალიტეტის საკრებულომ 20 აგვისტოს მიიღო. გუშინ კი, ჭელაში მინარეთის დემონტაჟი განხორციელდა. რამდენიმე საათის განმავლობაში გადაკეტილი იყო სოფლისკენ მიმავალი გზა. მოძრაობა მას შემდეგ აღდგა, რაც სოფლიდან მინარეთი გამოიტანეს.
მინარეთის დემონტაჟის პროცესში სამართალდამცველებისთვის გაწეული წინააღმდეგობის და მათთვის სამსახურებრივი უფლებამოსილების შესრულებაში ხელის შეშლის ბრალდებით ათობით ადილობრივი მუსლიმი დააკავეს.
ამასთან, ახალციხის პოლიციის სამმართველოსთან ორი დღის განმავლობაში მუსლიმი მრევლის საპროტესტო აქციები მიმდინარეობდა. მომიტინგეები დაკავებულების დაუყოვნებლივ გათავისუფლებას ითხოვდნენ, წინააღმდეგ შემთხვევაში კი, პრემანენტული აქციებით იმუქრებოდნენ. სოფელ ჭელაში მცხოვრებ მუსლიმთა პროტესტს აჭარის რეგიონის მუფტი და აჭარაში მცხოვრები მუსლიმთა ნაწილიც შეუერთდნენ.
