"მინდა სინანული გამოვხატო სააკაშვილის მორიგ გამოხტომაზე, მისი უსირცხვილო განცხადებები თანაგრძნობადაც კი არ ღირს,"- ამის შესახებ საქართველოს ენერგეტიკის მინისტრმა, ვიცე-პრემიერმა კახი კალაძემ ადიგენის რაიონის სოფელ ჭელაში მეჩეთის მინარეთის დემონტაჟის საკითხზე პრეზიდენტ მიხეილ სააკაშვილის მიერ გაკეთებული განცხადებების კომენტირებისას ისაუბრა.
კალაძის თქმით, "იგი ხაზგასმით აღნიშნავს, რომ ნებისმიერი რელიგიური საფუძვლის მქონე კონფლიქტი არ ასახავს საერთო მდგომარეობას ქვეყანაში და არის ცალკეული, სხვადასხვა მიზეზით მოტივირებული ადამიანების ან მცირე ჯგუფების მოწყობილი პროვოკაცია.
„მინდა შევახსენო ჩემი ქვეყნის მოსახლეობას, რომ საქართველოში არასდროს მომხდარა რელიგიური დაპირისპირება, ეს არის ჩვენი ხალხის უდიდესი განძი რომელმაც საუკუნეებს და ისტორიის ქარტეხილებს გაუძლო და დღევანდლამდე მოვიტანეთ. მოვუწოდებ ყველა მოქალაქეს, გაიხსენოს პრემიერ- მინისტრის განცხადება აღმსარებლობის თავისუფლების კონსტიტუციური უფლების შესახებ. მოვუწოდებ ყველა მართლმადიდებელ ქრისტიანს, გაითავისოს კათოლიკოს-პატრიარქის შეგონება მოყვასის სიყვარულზე, მიუხედავად იმისა, რომელ სალოცავში დადის ის. აგრეთვე მინდა შეგახსენოთ ყველას, რომ პოლიტიკურად ურთულეს პერიოდში ვიმყოფებით და არჩევნებამდე მოსალოდნელია არაერთი ხელოვნურად შექმნილი პრობლემა თუ პროვოკაცია. ყველამ ვიცით რის ფასად მიიღწევა ვალდებულებად აღებული კოჰაბიტაცია და ყველამ ვიცით, რამდენად დესტრუქციულია ძალიან ბევრი, ჯერ კიდევ სხვადასხვა თანამდებობაზე მყოფი ჩინოვნიკი. როგორც ამ ქვეყნის მოქალაქემ მინდა სინანული გამოვხატო სააკაშვილის მორიგ გამოხტომაზე, მეჩეთის და დავით აღმაშენებლის სახელის გამოყენებაზე თავისი საფუძველს და მიზანს მოკლებული პიარისთვის. მისი უსირცხვილო განცხადებები თანაგრძნობადაც კი არ ღირს. რა შეიძლება უთხრა მას - ვისი ფასიც კაპიკია და მილიარდებით აფასებს თავის პერსონას? რა შეიძლება ითქვას რეჟიმის ლიდერზე, რომლის გასამართლებას ითხოვს ხალხი, და არა ცალკე აღებული რომელიმე პოლიტიკოსი? არანაირ პოლიტიკურ და პიროვნულ ფასეულობას ქვეყნისთვის, ხალხისთვის და ხალხის მიერ არჩეული ხელისუფლებისთვის ვინმე სააკაშვილი არ წარმოადგენს, რომ მას რამე ფასი დაედოს ან ვინმესგან იდევნებოდეს. იგი არის ქვეყნის პოლიტიკური წარსულის ნაწილი, თანამედროვე საქართველოს სირცხვილი და მას არ აქვს ადგილი ჩვენი ქვეყნის პოლიტიკურ მომავალში. მე პირადად გაგებით ვეკიდები მის პანიკას მოსალოდნელი ბრალდებებისადმი და ყველას მოგიწოდებთ, დაველოდოთ კანონის და სამართლიანობის ჩარჩოში მოქცეული მოვლენების განვითარებას", - განაცხადა კახი კალაძემ.
შეგახსენებთ, რომ საქართველოს პრეზიდენტმა მიხეილ სააკაშვილმა ბათუმში, მეჩეთთან შეკრებილ მუსლიმ მრევლთან შეხვედრისას ადიგენის რაიონის სოფელ ჭელაში მინარეთის დემონტაჟის ფაქტის კომენტირებისას განაცხადა, რომ "ის რაც ადიგენში მოხდა, წინასწარ განზრახული, ძალიან ცუდი შინაარსის მქონე პროვოკაციაა,"
პრეზიდენტის თქმით, "მსგავსი ტიპის პროვოკაციები წინა მთავრობის დროს არ ხდებოდა და ის, რომ ეს წინა მთავრობის დროს არ ხდებოდა, ეს არ იყო შიშის ბრალი, ეს იყო იმის ბრალი, რომ ჩვენ მუდმივად იმეორებდნენ სიტყვებს - საქართველოში ყველა თანასწორია, საქართველო ეკუთვნის ყველას".
"მე მინდა გამოვეხმაურო იმ უკანონობას, რომელიც ჩადენილი იყო ქართველი მუსლიმების მიმართ და რომელმაც აღგვაშფოთა ბევრი ქართველი მართმადიდებელი. ვფიქრობ, ის რაც მოხდა ადიგენში, არის სრულიად წინასწარ განზრახული, ძალიან ცუდი შინაარსის მქონე პროვოკაცია, რომელიც საბოლოო ჯამში, აპირისპირებს ქართველს ქართველთან, აპირისპირებს საქართველოს სხვადასხვა აღმსარებლობის მქონე მოქალაქეებს და ეს არის გაგრძელება მრავალთვიანი ტენდენციის,"- განაცხადა მიხეილ სააკაშვილმა.
მისივე თქმით, "მსგავსი ფაქტებით აზერბაიჯანთან და თურქეთთან ურთიერთობის დაძაბვის შემთხვევაში, საქართველო მხოლოდ ერთი მეზობლის - დამპყრობელი რუსეთის პირისპირ აღმოჩნდება".
"მოვუწოდებ ყველას, ვაწარმოოთ დიალოგი ერთმანეთთან, ვიმუშაოთ სამოქალაქო მშვიდობის მიღწევის კუთხით. ამავდროულად, უნდა ვთქვა, როცა გვყავს მეზობლები თურქეთი, აზერბაიჯანი და ეს მათთანაც გვიქმნის პრობლემებს. პრაქტიკულად, ჩვენ ვრჩებით მხოლოდ ერთი მეზობლის, ჩვენი დამპყრობლის - რუსეთის პირისპირ. ასეთი პროვოკაციების შედეგად, ჩვენ ვრჩებით დაუცველები. მთავრობას მოვუწოდებ, ჩამოაყალიბოს მწყობრი პოლიტიკა, გამოხატოს პოზიცია, რათა მომავალში ვერავინ შეძლოს ასეთი რაღაცის გაკეთება. მუსლიმებისთვის მინარეთის მოხსნა იგივეა, რაც ქრისტიანებისთვის ეკლესიიდან ჯვრის მოხსნა. მეჩეთის წინ მოვედი იმის გამო, რომ დავით აღმაშენებლის ტრადიციაა საქართველოში, საქართველოს მმართველები, პოლიტიკოსები ყველა აღმსარებლობას ერთნაირად სცემდნენ პატივს. მე, როგორც მართლმადიდებელმა, მინდა გამოვხატო სრული პატივისცემა ჩვენი მუსლიმი სისხლის და ხორცის მიმართ. საქართველოში არის რამდენიმე ასეული ათასი მუსლიმი და არავის აქვს უფლება რაიმე სახის შუღლი ჩამოაგდოს მათსა და დანარჩენ ქართველებს შორის", - აღნიშნა სააკაშვილმა