რეინტეგრაციის საკითხებში სახელმწიფო მინისტრი პაატა ზაქარეიშვილი მინართების აღმართვის თაობაზე ქვეყანაში რეფერენდუმის ჩატარების შესახებ საქართველოს იუსტიციის მინისტრ თეა წულუკიანის მიერ გაკეთებულ განცხადებას არ ეთანხმება.
ზაქარეიშვილის თქმით, "ერთადერთი სახელმწიფო, სადაც მინარეთების აშენების საკითხზე რეფერენდუმი ტარდება, შვეიცარიაა და მოცემულ შემთხვევაში, შვეიცარია კარგ ნიმუშად არ გამოდგება".
"ეს იგულისხმა ბუნებრივია, შვეიცარია. შვეიცარიაა ერთადერთი სახელმწიფო, სადაც რეფერენდუმით იქნა მიღებული გადაწყვეტილება, რომ მინარეთები არ აშენებულიყო. შვეიცარია არის ერთადერთი სახელმწიფო, სადაც ყველა გადაწყვეტილება რეფერენდუმებით მიიღება, არა მარტო მინარეთების საკითხი. ანუ, იქ არ არსებობს მეტნაკლებად მიღებული რამე სერიოზული გადაწყვეტილება, რომ რეფერენდუმით არ იყოს მიღებული. შესაბამისად, შვეიცარია ვერ გამოდგება სანიმუშო სახელმწიფოდ, სხვა ფორმები უნდა იყოს. ჩემი ღრმა რწმენით, ეს რა თქმა უნდა, კანონმა უნდა დაარეგულიროს და დღევანდელ კოჰაბიტაციის პერიოდში შეუძლებელია რამე კანონით დარეგულირდეს, იმიტომ, რომ მთელი რიგი კანონებისა რიგში დგას და ელოდება როდის იქნება პირველი მოსმენით მიღებული, მეორე მოსმენით მიღებული, ვეტო დადებული, ვეტო გადაცილებული და ასე შემდეგ. დღევანდელი პრეზიდენტის ხელში ძალიან რთულია ამ კანონმდებლობის სერიოზულად წარმართვა,"- განაცხადა პაატა ზაქარეიშვილმა.
ცნობისთვის, იუსტიციის მინისტრის თეა წულუკიანის განცხადებით, "მსგავს საკითხებზე დავა ქართული საზოგადოებისთვის ჩვეული ცივილური მეთოდებით უნდა გადაწყდეს და საზოგადოებამ ყოველგვარი ისტერიის გარეშე იმსჯელოს საკითხზე - უნდა იყოს თუ არა ჩვენს ქვეყანაში მინარეთები".
"სამწუხროდ, ჭელაში არის დაძაბული მდგომარეობა. ჭელა არის ალბათ ერთი და პირველი და არ არის გამორიცხული, ამ თემაზე საქართველოში სხვა სიტუაციებმაც მიგვიყვანოს საკითხის გადაჭრის აუცილებლობაზე, როგორიც არის მინარეთების თემა. ჩემი აზრით, ეს არ უნდა იყოს ტაბუდადებული თემა და საქართველოს საზოგადოებას ადრე თუ გვიან ჯანსაღად, ყოველგვარი ემოციების და მე ვიტყოდი ისტერიის, დაპირისპირების გარეშე მოუწევს იმსჯელოს შემდეგ საკითხზე - უნდა იყოს თუ არა ჩვენს ქვეყანაში მინარეთები,"- განაცხადა თეა წულუკიანმა.
მისივე თქმით, "სამწუხაროა, რომ მუფტებმა სხვა მრწამსის ადგილობრივი მოსახლეობის საქმის კურსში ჩაყენების გარეშე, ერთ ღამეში, ჩუმად აღმართეს მინარეთი".
"მე მინდა მოვუწოდო ყველა მუსლიმს და პირველ რიგში მუფტებს, მათ ადგილას მეც ვიქნებოდი შეურაცხყოფილი იმით, რაც მოხდა, მაგრამ დანანება მინდა გამოვთქვა იმასთან დაკავშირებით, რომ მუსლიმმა სასულიერო პირებმა დაუშვეს ერთ ღამეში, ჩუმად მინარეთის აღმართვა ისე, რომ არც სხვა მრწამსის მატარებელი ადგილობრივი მოსახლეობა ჩააყენეს საქმის კურსში და არც ადგილობრივი თუ ცენტრალური ხელისუფლება,"- აღნიშნა წულუკიანმა.
შეგახსენებთ, რომ სოფელ ჭელას მინარეთის დემონტაჟის გადაწყვეტილება ადიგენის მუნიციპალიტეტის საკრებულომ 20 აგვისტოს მიიღო. გუშინ კი, ჭელაში მინარეთის დემონტაჟი განხორციელდა. რამდენიმე საათის განმავლობაში გადაკეტილი იყო სოფლისკენ მიმავალი გზა. მოძრაობა მას შემდეგ აღდგა, რაც სოფლიდან მინარეთი გამოიტანეს.
მინარეთის დემონტაჟის პროცესში სამართალდამცველებისთვის გაწეული წინააღმდეგობის და მათთვის სამსახურებრივი უფლებამოსილების შესრულებაში ხელის შეშლის ბრალდებით ათობით ადილობრივი მუსლიმი დააკავეს.
ამასთან, უკვე მეორე დღეა ახალციხის პოლიციის სამმართველოსთან მუსლიმი მრევლის საპროტესტო აქცია მიმდინარეობს. მომიტინგეები დაკავებულების დაუყოვნებლივ გათავისუფლებას ითხოვენ, წინააღმდეგ შემთხვევაში კი, პრემანენტული აქციებით იმუქრებიან.