"ადიგენის რაიონის სოფელ ჭელას თემა, რომელიც არსებობს და რომელიც რეალურად არ არსებობს, ძალიან მალე გადაწყდება,"- ამის შესახებ კოალიცია "ქართული ოცნების" საპრეზიდენტო კანდიდატმა გიორგი მარგველაშვილმა ადიგენის რაიონის სოფელ ჭელაში მინარეთის დემონტაჟის ფაქტის კომენტირებისას ისაუბრა.
მისივე თქმით, "საბაჟო სამსახურები უაღრესად კანონის დაცვით უნდა მუშაობდნენ, მაგრამ ამავე დროს, როდესაც არის ასეთი ფაქიზი თემები, მათ არსებულ კითხვებზე პასუხი სწრაფად უნდა გასცენ და გაურკვევლობა მოიხსნას".
"მე დარწმუნებული ვარ, რომ ეს პროცესი მიმდინარეობს. მე ინფორმირებული ვარ იმის შესახებ, რომ პროცესში ძალიან აქტიურად ჩართულია არა მხოლოდ ფინანსთა სამინისტრო, არამედ ბატონი პაატა ზაქარეიშვილიც და ეს პრობლემა, თემა, რომელიც არსებობს და რომელიც რეალურად არ არსებობს, ძალიან მალე გადაწყდება,"- განაცხადა გიორგი მარგველაშვილმა.
შეგახსენებთ, რომ სოფელ ჭელას მინარეთის დემონტაჟის გადაწყვეტილება ადიგენის მუნიციპალიტეტის საკრებულომ 20 აგვისტოს მიიღო. გუშინ კი, ჭელაში მინარეთის დემონტაჟი განხორციელდა. რამდენიმე საათის განმავლობაში გადაკეტილი იყო სოფლისკენ მიმავალი გზა. მოძრაობა მას შემდეგ აღდგა, რაც სოფლიდან მინარეთი გამოიტანეს.
მინარეთის დემონტაჟის პროცესში სამართალდამცველებისთვის გაწეული წინააღმდეგობის და მათთვის სამსახურებრივი უფლებამოსილების შესრულებაში ხელის შეშლის ბრალდებით ათობით ადილობრივი მუსლიმი დააკავეს.
ამასთან, უკვე მეორე დღეა ახალციხის პოლიციის სამმართველოსთან მუსლიმი მრევლის საპროტესტო აქცია მიმდინარეობს. მომიტინგეები დაკავებულების დაუყოვნებლივ გათავისუფლებას ითხოვენ, წინააღმდეგ შემთხვევაში კი, პრემანენტული აქციებით იმუქრებიან.