"ადიგენის რაიონის გამგებელმა მინარეთის დაშლის უკანონო ბრძანების შესრულებაზე უარი თქვა და რამდენიმე დღეში დააკავეს,"- ამის შესახებ საქართველოს პრეზიდენტმა მიხეილ სააკაშვილმა ბათუმში, მეჩეთთან შეკრებილ მუსლიმ მრევლთან შეხვედრისას ადიგენის რაიონის სოფელ ჭელაში მინარეთის დემონტაჟის ფაქტის კომენტირებისას ისაუბრა.
"მინდა, ასევე გამოვეხმაურო ადიგენის რაიონის გამგებლის დაკავებას 2009 წელს რაღაცა დარღვევის ბრალდებით. მინდა, ვუთხრა მთავრობას, რომ ნუ ჩაიგდებს თავს უხერხულ სიტუაციებში. რას ნიშნავს გამგებლის დაკავება დღეს, როდესაც იქ სამოქალაქო დაძაბულობის კერაა?! ჩემი ინფორმაციით, ადიგენის რაიონის გამგებელმა ამ უკანონო ბრძანების შესრულებაზე მინარეთის დაშლასთან დაკავშირებით, უარი თქვა. ამ გამგებელს ბრძანების შეუსრულებლობიდან რამდენიმე დღეში აკავებ 2009 წელს რაღაც სამსახურეობრივი გადაცდენის ბრალდებით. ეს არა მხოლოდ ძალიან უხერხული რამ, არამედ ძალიან, ძალიან დიდი უპატივცემულობაა ქართული საზოგადოების მიმართ. მე ვფიქრობ, რომ კანონიერება უნდა აღდგეს, ყველას უფლებები უნდა იქნეს უზრუნველყოფილი. იქაც, ადგილზე ძალიან ბევრი მართლმადიდებელი და სხვა აღმსარებლობის ხალხი დიდი აღშფოთებით შეხვდა იმას, რაც მოხდა და ყველამ უნდა დავიცვათ საქართველოს კონსტიტუცია და ჩვენი მოქალაქეების სამოქალაქო უფლებები,"- განაცხადა მიხეილ სააკაშვილმა.
ცნობისთვის, ფინანსთა სამინისტროს საგამოძიებო სამსახურმა ადიგენის მუნიციპალიტეტის გამგებლის სიმონ პარუნაშვილის დაპატიმრების თაობაზე ოფიციალური განცხადება ცოტა ხნის წინ გაავრცელა.
უწყების ინფორმაციით, სიმონ პარუნაშვილი სამსახურეობრივი უფლებამოსილების ბოროტად გამოყენებისა და გულგრილობის ფაქტებზე დააკავეს.
"გამოძიებით დადგინდა, რომ ადიგენის მუნიციპალიტეტის გამგეობის მიერ 2011 წლის 5 მაისს გამოცხადებულ ტენდერში სიმონ პარუნაშვილმა, რომელიც სატენდერო კომისიის თავმჯდომარე იყო, კომისიის სხვა წევრებთან ერთად "სახელმწიფო შესყიდვების შესახებ" საქართველოს კანონის უგულვებელყოფით, ბოროტად გამოიყენა სამსახურეობრივი უფლებამოსილება და უპირატესობა მიანიჭა სატენდერო კომისიის ერთ-ერთი წევრის კუთვნილ საწარმოს შპს "ადიგენი 2009"-ს, რომელიც ტენდერში გამარჯვებულად გამოაცხადეს, რამაც სახელმწიფოს კანონიერი ინტერესის არსებითი დარღვევა გამოიწვია. ადიგენის მუნიციპალიტეტის გამგეობის მიერ 2012 წლის 7 ივნისს გამოცხადებულ ტენდერში სატენდერო კომისიის თავჯდომარემ სიმონ პარუნაშვილმა, სატენდერო კომისიის წევრებთან ერთად, ბოროტად გამოიყენა სამსახურეობრივი უფლებამოსილება და უპირატესობა მიანიჭა შპს "ნამქერის" მიერ წარმოდგენილ წინადადებას, სადაც საწარმოს ხელმძღვანელის ანტონ მერაბიშვილის მიერ ხელოვნურად იყო გაზრდილი შესასრულებელი სამუშაოების მოცულობა და ღირებულება. სატენდერო კომისიამ მოცემულ ტენდერში შპს "ნამქერი" გამოაცხადა გამარჯვებულად, მაშინ როდესაც "სახელმწიფო შესყიდვების შესახებ" საქართველოს კანონის თანახმად, ვალდებული იყო მოეხდინა შპს "ნამქერის" დისკვალიფიკაცია, რამაც სახელმწიფოს კანონიერი ინტერესის არსებითი დარღვევა გამოიწვია. საქმეზე გამოძიება სისხლის სამართლის კოდექსის 332-ე მუხლითა და 342-ე მუხლით მიმდინარეობს, რაც სასჯელის სახით თავისუფლების აღკვეთას სამ წლამდე ვადით ითვალიწინებს,"- ნათქვამია ფინანსთა სამინისტროს საგამოძიებო სამსახურის მიერ გავრცელებულ განცხადებაში.
გამგებლის დაკავების ფაქტს ადიგენის რაიონის მაჟორიტარი დეპუტატიც გამოეხმაურა. ზურაბ ჩილინგარაშვილის განცხადებით, ფინანსთა სამინისტროს საგამოძიებო სამსახურის თანამშრომლებმა ადიგენის გამგებელი სიმონ პარუნაშვილი სოფელ ჭელას მოვლენების გადასაფარად, 2009 წელს ჩადენილი გადაცდომის გამო დააკავეს.
"ფინანსთა სამინისტროს უსუსური მცდელობაა გუშინდელი ამბავი გადაფაროს გამგებლის დღევანდელი დაკავებით. იმიტომ, რომ 2009 წელს რაღაცა სამსახურებრივი უფლებამოსილების გადამეტების გამო ადამიანი დააკავო დღეს, 2013 წლის 27 აგვისტოს, თანაც იმ დღეს, როდესაც აქ ასეთი ამბები ხდება და გადაუდებელი აუცილებლობის გამო დააკავო, ყოველგვარი სასამართლოს ბრძანების გარეშე, მიმაჩნია, რომ ეს არის უსამართლობა და პოლიტიკური გადაწყვეტილებაა," - განაცხადა ზურაბ ჩილინგარაშვილმა.
