საქართველოს იუსტიციის მინისტრის თეა წულუკიანის განცხადებით, "სამწუხაროა, რომ მუფტებმა სხვა მრწამსის ადგილობრივი მოსახლეობის საქმის კურსში ჩაყენების გარეშე, ერთ ღამეში, ჩუმად აღმართეს მინარეთი".
მინისტრის თქმით, "მინარეთის ქონა-არქონაზე არ არის დამოკიდებული მეჩეთებში იქნება თუ არა ლოცვის შესაძლებლობა და მინარეთების აღმართვის საკითხი ქვეყანაში მცხოვრები ყველა აღმსარელობის ადამიანის აზრის გამოკითხვის შედეგად უნდა გადაწყდეს".
"ეს არ უნდა იყოს თაბუდადებული თემა და ჩემი აზრით, საქართველოს საზოგადოებას ადრე თუ გვიან მოუწევს ჯანსაღად, ყოველგვარი ემოციების და ისტერიის გარეშე იმსჯელოს შემდეგ საკითხზე - უნდა იყოს თუ არა ჩვენს ქვეყანაში მინარეთები. ეს საკითხი სხვადასხვა ევროპულმა ქვეყანამ სხვადასხვა დროს სხვადასხვანაირად გადაწყვიტა. ზოგიერთმა მათგანმა რეფერენდუმის გზით უარი თქვა მინარეთებზე. საქართველომ თვითონ უნდა მიიღოს გადაწყვეტილება ყველა ჩვენი მოქალაქის, ყველანაირი მრწამსის მოქალაქის ჩართულობით თუ რა გვინდა ჩვენ, ქართველებს, უნდა გვქონდეს თუ არა საქართველოში მინარეთები. ჩვენს ქვეყანაში მინარეთის ქონა-არქონაზე არ არის დამოკიდებული იქნება თუ არა მეჩეთში ლოცვა. ჭელაში, იმ მეჩეთში სადაც როგორც ჩანს, მინარეთი უკვე მოხსნილია, ლოცვას არაფერი ხელს არ უშლის. მე მინდა მოვუწოდო ყველა მუსლიმს და პირველ რიგში მუფტებს, მათ ადგილას მეც ვიქნებოდი შეურაცხყოფილი იმით, რაც მოხდა, მაგრამ დანანება მინდა გამოვთქვა იმასთან დაკავშირებით, რომ მუსლიმმა სასულიერო პირებმა დაუშვეს ერთ ღამეში, ჩუმად მინარეთის აღმართვა ისე, რომ არც სხვა მრწამსის მატარებელი ადგილობრივი მოსახლეობა ჩააყენეს საქმის კურსში და არც ადგილობრივი თუ ცენტრალური ხელისუფლება,"- განაცხადა თეა წულუკიანმა.
შეგახსენებთ, რომ სოფელ ჭელას მინარეთის დემონტაჟის გადაწყვეტილება ადიგენის მუნიციპალიტეტის საკრებულომ 20 აგვისტოს მიიღო. გუშინ კი, ჭელაში მინარეთის დემონტაჟი განხორციელდა. რამდენიმე საათის განმავლობაში გადაკეტილი იყო სოფლისკენ მიმავალი გზა. მოძრაობა მას შემდეგ აღდგა, რაც სოფლიდან მინარეთი გამოიტანეს.
მინარეთის დემონტაჟის პროცესში სამართალდამცველებისთვის გაწეული წინააღმდეგობის და მათთვის სამსახურებრივი უფლებამოსილების შესრულებაში ხელის შეშლის ბრალდებით ათობით ადილობრივი მუსლიმი დააკავეს.
ამასთან, უკვე მეორე დღეა ახალციხის პოლიციის სამმართველოსთან მუსლიმი მრევლის საპროტესტო აქცია მიმდინარეობს. მომიტინგეები დაკავებულების დაუყოვნებლივ გათავისუფლებას ითხოვენ, წინააღმდეგ შემთხვევაში კი, პრემანენტული აქციებით იმუქრებიან.
