საქართველოს განათლების და მეცნიერების მინისტრის თამარ სანიკიძის განცხადებით, ერთიანი ეროვნული გამოცდები 2013-ის საბოლოო შედეგების გამოცხადების შემდეგ 700-მდე სტუდენტის სტატუსის გარეშე დარჩენილ აბიტურიენტს მეორადი ჩარიცხვის შესაძლებლობა ექნება.
მინისტრის თქმით, მეორადი ჩარიცხვის წესი გაუქმებული იყო, თუმცა განათლების სამინისტრომ უმაღლესი საგანმანათლებლო დაწესებულებების მიღმა დარჩენილი სტუდენტების და მათი ოჯახის წევრების თხოვნის გათვალისწინებით გამონაკლისი დაუშვა, მაგრამ შესაძლოა აბიტურიენტებს პირველად განაცხადში მითითებული მათთვის სასურველი ფაკულტეტების შეცვლა მოუწიოთ.
"გადაწყვეტილება დღეს იქნა მიღებული და ეს გადაწყვეტილება მათთვის სასიკეთოა. სამწუხაროდ, საქმე იმაშია, რომ მიუხედავად იმისა, რომ წელს ისეთი პროცედურები იყო დაშვებული, რომლებიც წესით ყველა მსგავსი პრობლემის თავიდან აცილებას უზრუნველყოფდა, ანუ წელს პირველად ჰქონდა აბიტურიენტს საშუალება, რომ შეუზღუდავად, განუსაზღვრელი რაოდენობით შეეძლოთ უმაღლესი საგანმაათლებლო დაწესებულებების არჩევა. მათ ეს ვერ განახორციელეს და შესაბამისად მსგავსი პრობლემის წინაშე დადგნენ. გაურკვეველი და ძალიან რთულია დაადგინო ის მიზეზი, რატომ არ ან ვერ გააკეთეს ეს აბიტურიენტებმა. დღეს მათ ნაწილთან შეხვედრა მქონდა, ასევე შევხვდი მშობლებს, ვისაუბრეთ, გავიარეთ მთელი ეს პროცედურა. აქ ერთაზროვნად და ცალსახად ჩანს, რომ სამინისტროს მხრიდან არავითარ დარღვევას ადგილი არ ჰქონია. ყველაფერი პროცედურების დაცვით მიმდინარეობდა, მაგრამ იქიდან გამომდინარე, რომ მე პირადად როგორც მინისტრს, როგორც მშობელს, ამ ახალგაზრდების ბედი მადარდებს და ეს არიან აბიტურიენტები, ვინც მინიმალური კომპეტენციის ზღვარი გადალახეს, ვფიქრობ, რომ მე მას ჩემი კომპეტენციის ფარგლებში და იქიდან გამომდინარე რომ ამის დისკრეცია დღესდღეობით გამაჩნია, მივცემ საშუალებას, რომ კიდევ სცადონ ბედი, უმაღლეს საგანმანათლებლო დაწესებულებაში მეორადი ჩარიცხვის მეშვეობით ჩააბარონ. სამწუხაროა მხოლოდ ის ფაქტი, რომ ის პროფესია, წინასწარ შერჩეული მიმართულება, რომლისთვისაც სტუდენტი ემზადებოდა, მისდამი განწყობილი იყო და მის პრიორიტეტს წარმოადგენდა, ამ შემთხვევაში შესაძლოა, მათ არჩევანის შეცვლა მოუხდეთ და სხვა მიმართულებით წავიდნენ,"- განაცხადა თამარ სანიკიძემ.
შეგახსენებთ, რომ ერთიანი ეროვნული გამოცდეი 2013-ის საბოლოო შედეგების მიხედვით, 700-მდე აბიტურიენტმა ყველა გამოცდაზე მინიმალური კომპეტენციის ზღვარი გადალახა, თუმცა ვერც-ერთ უმაღლეს საგანმანათლებლო დაწესებულებაში ვერ ჩააბარა.
