ბოლნისის საკრებულოს 4 ფრაქციის დეპუტატები საკრებულოს დარბაზში დახურულ კარს მიღმა არიან შეკრებილნი და მათთან შეჭრას საკრებულოს თავმჯდომარის მალხაზ ერაძის მომხრეები ცდილობენ.
მალხაზ ერაძის მომხრეები აღნიშნულ სხდომაზე დასწრებას კატეგორიულად მოითხოვენ, რადგან მათი ინფორმაციით, დღეს დეპუტატები ერაძის იმპიჩმენტის საკითხის დაყენებას გეგმავენ, თუმცა მათ ადგილზე მობილიზებული სამართალდამცველები დარბაზში შესვლის საშუალებას არ აძლევენ.
მათი თქმით, დახურულ კარს მიღმა მიმდინარე სხდომას "ნაციონალური მოძრაობის" ინტერესების გამტარებელი დეპუტატები ატარებენ და ფრაქცია "ქართული ოცნების" წარმომადგენელი საკრებულოს თავმჯდომარის გადაყენებას უყრიან კენჭს.
დახურულ კარს მიღმა მიმდინარე სხდომის მონაწილე დეპუტატთა განცხადებით, დღეს განსახილველ 6 საკითხს შორის, ბოლო, მე-6 საკითხი საკრებულოს თავმჯდომარის იმპიჩმენტი იყო და მისი მნიშვნელობიდან გამომდინარე, აღნიშნული საკითხის პირველ რიგში გადატანა მოხდა. მათივე ინფორმაციით, მალხაზ ერაძის გადაყენების საკითხს უკვე ეყარა კენჭი და მის იმპიჩმენტს მხარი ბოლნისის საკრებულოს 13-მა დეპუტატმა დაუჭირა.
ბოლნისის საკრებულოში სხდომა 15:00 სათისთვის იყო ჩანიშნული. საკრებულოს რიგგარეშე სხდომის ჩატარების საკითხი ბიუროს დღევანდელ სხდომაზე 4 ფრაქციის წარმომადგენელი 8 დეპუტატის ინიციატივით დადგა. საკრებულოს მოქმედმა თავმჯდომარემ მალხაზ ერაძემ სხდომის ღია რეჟიმში ჩატარება და მასზე ადგილობრივი მოსახლეობის დასწრება მოითხოვა, რასაც რიგგარეშე სხდომის ინიციატორი ფრაქციების წარმოამდგენლები შეეწინააღმდეგნენ და სხდომის მცირე დარბაზში, დახურულ კარს მიღმა ჩატარება გადაწყდა.
მალხაზ ერაძე დახურულ კარს მიღმა მიმდინარე სხდომას არ დასწრებია, თუმცა იგი მის მომხრეებთან ერთად მთელი დღის განმავლობაში ბოლნისის საკრებულოს შენობასთან იმყოფება.
ჯერ-ჯერობით უცნობია დარჩება თუ არა მალხაზ ერაძე ბოლნისის საკრებულოს თავმჯდომარის თანამდებობაზე. არნიშნულ საკითხზე საბოლოო გადაწყვეტილება უახლოეს პერიოდში გახდება ცნობილი.