საქართველოს შინაგან საქმეთა სამინისტრო არ ადასტურებს ფაქტს, რომ გუშინ, 12:00 საათზე თბილისში, მეტროსადგურ "სამედიცინო ინსტიტუტის" სალიანდაგო მონაკვეთზე 15 წლის გოგონას მატარებელმა გადაუარა.
როგორც "ჯი-ეიჩ-ენს" შინაგან საქმეთა სამინისტროს საზოგადოებრივ საქმეთა დეპარტამენტში განუცხადეს, მსგავს ფაქტს ადგილი არ ჰქონია.
"კონკრეტულმა საინფორმაციო სააგენტომ გადაუმოწმებელი ინფორმაცია გაავრცელა, რაზე დაყრდნობითაც ასევე გადაუმოწმებლად კიდევ რამდენიმე სააგენტომ იგივე ცრუ ინფორმაცია გაავრცელა,"- განუცხადეს "ჯი-ეიჩ-ენს" შსს-ში.
ცნობისთვის, გუშინ გავრცელებული ინფორმაციის თანახმად, "15 წლის მოზარდი ბაქნიდან მას შემდეგ ჩავარდა, რაც სადგურსა და მთელს დედაქალაქში დროებით ელექტროენერგია გაითიშა. გოგონას დედამ მომხდარი შეამჩნია და ყვირილი ატეხა, თუმცა მომავალმა მატარებელმა დამუხრუჭება ვეღარ მოასწრო. გოგონა ადგილზე გარდაიცვალა. ადგილზე პოლიცია და სასწრაფო დახმარების ბრიგადები მივიდნენ და მგზავრებს ტერიტორია სასწრაფოდ გვირაბებით დაატოვებინეს,"- ნათქვამია გავრცელებულ ინფორმაციაში.
"ჯი-ეიჩ-ენს" ს.ს. "თელასში" მთელი ქალაქის მასშტაბით და მათ შორის დედაქალაქის მიწისქვეშა ტრანსპორტში ელექტროენერგიის დროებით გათიშვის ფაქტი არ დაუდასტურეს.
