თბილისის საქალაქო სასამართლოში შინაგან საქმეთა და თავდაცვის ყოფილი მინისტრის ბაჩო ახალაიას საქმის განხილვა დღეს გაგრძელდება.
წინა პროცესზე ბრალდების მხარემ დასკვნითი სიტყვა წარმოადგინა. დასკვითი სიტყვით ასევე ბაჩო ახალაიასთან ერთად ბრალდებული სამი პირის, დავით ჩუბინიძის, დავით გიორგაშვილის და ვლადიმერ ზანგიევის ადვოკატები გამოვიდნენ.
პროკურორ შაქრო ზაალიშვილის თქმით, დასკვნითი სიტყვა მტკიცებულებებზე იყო დამყარებული, რასაც ახალაიას ადვოკატები არ ეთანხმებიან და მიიჩნევენ, რომ პროკურატურის არგუმენტები სუსტი იყო.
"ის დანაშაული, რომელიც ბაჩო ახალაიას ბრალად აქვს შერაცხული, არის სრული აბსურდი. იგივე აბსურდი იყო ის დასკვნითი სიტყვა და იგივე ტყუილი იყო, რაც ბატონმა პროკურორმა ბოლო პროცესზე განაცხადა. რაც შეეხება ჩვენს მოლოდინს, ველოდებით აუცილებლად გამამართლებელ განაჩენს, ვინაიდან განაჩენი დასკვნით სიტყვაზე დამოკიდებული არ არის, არამედ დამოკიდებულია მტკიცებულებებზე, რომლებიც მთელი ამ პროცესის განმავლობაში სასამართლოს მიერ იქნა გამოკვლეული,"- განაცხადა ადვოკატმა გიორგი ონიანმა.
პროკურორმა დღესვე განმარტა თუ რატომ არ ესწრებოდნენ პროცესს დაზარალებულები. მისი შეფასებით, მსგავსი გადაწყვეტილება უთანხმოების თავიდან აცილების მიზნით მიიღეს.
შეგახსენებთ, რომ საქმე ეხება 2012 წლის აგვისტოში მომხდარ ფაქტს, როდესაც ბრალდებულების მხარის მტკიცებით, პოლიტიკური შეხედულებების გამო ბაჩო ახალაიას ორგანიზებით 7 ადამიანის მიმართ წამება, დამამცირებელი, არაადამიანური მოპყრობა და თავისუფლების უკანონოდ აღკვეთა განხორციელდა.