ალჟირსა და ხორვატიაში, სლოვენური კომპანიის კუთვნილებაში მცურავ გემზე დარჩენილ მეზღვაურებს, რომელთა შორის საქართველოს მოქალაქეებიც არიან, საკვები და სასმელი წყალი უკვე მიაწოდეს. საგარეო საქმეთა სამინისტროს ინგფორმაციით, გემზე დარჩენილი მეზღვაურები, მეზღვაურთა უფლებათა დამცველი საერთაშორისო ორგანიზაციის წარმომადგენლებმაც მოინახულეს. მათ მეზღვაურებს სამშობლოში დაბრუნება და ტრანსპორტის ხარჯების დაფარვა შესთავაზეს, თუმცა მეზღვაურები გემთმფლობელი კომპანიისგან სახელფასო დავალიანების გასტუმრებას ითხოვენ და ხომალდის დატოვებას არ აპირებენ.
სლოვენიაში საქართველოს საელჩო გემთფლობელ კომპანიას დაუკავშირდა, რის შემდეგაც მეზღვაურები საკვებითა და პირველადი საჭიროების ნივთებით მოამარაგეს. თავად გემთმფლობელი კომპანია გაკოტრებულია და როგორც კომპანიაში საქართველოს საქმეთა დროებით რწმუნებულს ალექსანდრე ჭკუასელს განუცხადეს, კომპანიასა და კომერციულ ბანკს შორის მიმდინარეობს მოლაპარაკება, რათა მოხდეს ფინანსური დანახარჯებისა და სახელფასო დავალიანების დაფარვა.
შეგახსენებთ ალჟირისა და ხორვატიის ტერიტორიულ წყლებში მცურავი, სლოვენური კომპანიის კუთვნილი ორი გემი, (დაახლოებით ორი თვეა) გაჩერებულია. ეკიპაჟის წევრებს შორის 12 (5 ხორვატიაში, ხოლო 7 ალჟირში) ქართველი მეზღვაურია. სლოვენიაში საქართველოს საელჩო მეზღვაურებთან მუდმივ კონტაქტზე იმყოფება და არსებული პრობლემის მოგვარებას ცდილობს.
