ქრისტიან-დემოკრატიული მოძრაობის პრეზიდენტობის კანდიდატმა გიორგი თარგამაძემ და მოძრაობის ლიდერებმა საქართველოს კონსტიტუციაში ტრადიციული ქორწინების მხარდამჭერი ჩანაწერის შესატანად ხელმოწერების შეგროვება მთელი საქართველოს მასშტაბით უკვე დაიწყეს. დღეს გიორგი თარგამაძე კახეთის რაიონის მოსახლეობას და მხარდამჭერებს სოფელ კაჭრეთში შეხვდა და პირადად გააცნო ქრისტიან-დემოკრატების ინიციატივა: „სახელმწიფო აღიარებს და იცავს მხოლოდ მამაკაცისა და ქალის ქორწინებას, რომელიც ემყარება მეუღლეთა უფლებრივ თანასწორობასა და ნებაყოფლობითობას." როგორც გიორგი თარგამაძემ აღნიშნა კონსტიტუციაში ამ ჩანაწერის არსებობა არის ტრადიციული (არაერთსქესიანი) ოჯახის დაცვის ყველაზე მყარი სახელმწიფო სამართლებრივი გარანტია.
„დიდი იმედი გვაქვს რომ საქართველოს მოსახლეობა, განურჩევლად ეროვნებისა და აღმსარებლობისა, გვერდში დაგვიდგება და ერთად გავხდებით მომავალი, ტრადიციებზე დაფუძნებული ქვეყნის გარანტი. დღეს კახეთის მოსახლეობამ ხელმოწერებით დაადასტურა ჩვენი ინიციატივის მხარდაჭერა. ჩვენ გავაგრძელებთ შეხვედრებს საქართველოს ყველა კუთხის მოსახლეობასთან და გვჯერა, რომ ხელმოწერების რიცხვი იქნება გაცილებით მეტი, ვიდრე ამას კანონი მოითხოვს კონსტიტუციაში ცვლილების შესატანად" -საქართველოს პრეზიდენტობის კანდიდატი გიორგი თარგამაძე.