თბილისის საქალაქო სასამართლოს გადაწყვეტილბით, ევროინტეგრაციის საკითხებში სახელმწიფო მინისტრის აპარატის თანამშრომელ დავით გამყრელიძეს ადმინისტრაციული ჯარიმის სახით 400 ლარი შეეფარდა. აღნიშნულის შესახებ მოსამართლის გადაწყვეტილება ცოტა ხნის წინ გახდა ცნობილი.
შეგახსენებთ, რომ შინაგან საქმეთა სამინისტროს საპატრულო პოლიციის დეპარტამენტის თანამშრომლებმა თბილისში, მაჩაბლის ქუჩაზე მოქალაქე დავით გამყრელიძე წინააღმდეგობის გაწევისთვის გუშინ საღამოს დააკავეს. გამყრელიძე ტაბიძის ქუჩაძე ერთ-ერთ ბარში იმყოფებოდა, რა დროსაც, იქ მყოფებთან შელაპარაკება მოუვიდა და შემდეგ ფიზიკურ დაპირისპირებაში გადაიზარდა.
დავით გამყრელიძემ საპატრულო პოლიციას დახმარებისთვის თავად მიმართა, თუმცა შემდეგ პოლიციელებთან კონფლიქტში შევიდა რაც მისი დაკავებით დასრულდა. დაკავებულის ინფორმაციით, ის სახელმწფო მინისტრის, ალექსი პეტრიაშვილის მრჩეველია, თუმცა სახელმწიფო მინისტრის აპარატში აცხადებენ, რომ დავით გამყრელიძე სახელმწიფო მინისტრის მრჩეველი არ არის. მათივე ინფორმაციით, ის საკონტრაქტო ვადით 3 კვირაა აპარატში მუშაობს.
