გურიაში, ქუთაისი-ქობულეთი-სოხუმის განშტოების 44-ე კილომეტრზე ძლიერი წვიმის გამო დაზიანებული ცენტრალური გაზსადენი მილის სარეაბილიტაციო სამუშაოებს საქართველოს ენერგეტიკის მინისტრი, ვიცე-პრემიერი კახი კალაძე ადგილზე აკვირდება.
მინისტრის თქმით, დაზიანებული გაზსადენი მილის დროებით შეკეთება დღის ბოლომდე ან ხვალ დილით დასრულდება, რის შემდეგც აჭარის რეგიონის მოსახლეობას გაზმომარაგება ჩვეულ რეჟიმში აღუდგება.
"დიდია ალბათობა, რომ ოზრურგეთის რაიონის ერთ-ერთ სოფელში ძლიერმა წვიმამ მდინარე ნატანების ადიდება გამოიწვია და სწორედ ეს გახდა გაზსადენი მილის დაზიანების მიზეზი. შემთხვევის შედეგად, დასავლეთის და აღმოსავლეღთის დამაკავშირებელი ცენტრალური გაზსადენი მაგისტრალის ნაწილი პრაქტიკულად მოგლეჯილია. ამ დროისთვის უკვე დაიწყო სარემონტო სამუშაოები. გათიშული იყო ოზურგეთის და მთლიანად აჭარის რეგიონის აბონენტები. მთლიანად აჭარის რეგიონის მოსახლეობას ისევ არ მიეწოდება ბუნებრივი აირი, ოზურგეთის მოსახლეობას, კი, პრაქტიკულად უკვე აღუდგა გაზმომარაგება,"- განაცხადა კახი კალძემ.
შეგახსენებთ, რომ გურიაში ორდღიანი გადაუღებელი წვიმის გამო, ქალაქ ოზურგეთის რამდენიმე ქუჩა და მიმდებარე სოფლები დაიტბორა.
ასევე, დატბორილია საცხოვრებელი სახლების პირველი სართულები და დახოცილია შინაური ცხოველი და ფრინველი.
ცნობისთვის, გურიაში მომხდარი სტიქიის შედეგების სალიკვიდაციოდ სპეციალური სამთავრობო კომისია შეიქმნა.
მინისტრთა კაბინეტის წევრების განცხადებით, მიყენებული ზარალის ზუსტი ოდებნობა ჯერ-ჯერობით უცნობია, თუმცა ცენტრალური ხელისუფლება დაზარალებულ მოსახლეობას შესაბამის დახმარებას უახლოეს მომავალში აღმოუჩენს.
