31 ივლისს, აშშ-ის პრეფერენციათა განზოგადებული სისტემის (GSP) მოქმედებას ვადა ამოეწურა, როგორც საქართველოსთვის, ასევე ამ სქემით მოსარგებლე სხვა ქვეყნებისთვის. ეკონომიკისა და მდგრადი განვიტარების სამინისტროს ინფორმაციით, საქართველოდან აშშ-ში ექსპორტირებული საქონელი 2013 წლის პირველი აგვისტოდან არაპრეფერენციული გადასახადით (most-favored-nation duties) დაიბეგრება.
„ამასთან, 2013 წლის 17 ივლისს აშშ-ს წარმომადგენელთა პალატის ასიგნებების კომიტეტისა და ვაჭრობის ქვეკომიტეტის თავმჯდომარეების მიერ მომზადდა და ინიცირება მოხდა საკანონმდებლო აქტის, რომელიც ითვალისწინებს GSP-ის სქემის მოქმედების ვადის განახლებას 2015 წლის 30 სექტემბრამდე ე.წ. ,,უკუქცევითი ძალით". GSP-ის სქემის განახლების შემთხვევაში, აღნიშნული ექსპორტიორებს საშუალებას მისცემს აინაზღაურონ საიმპორტო ტარიფის სახით გადახდილი თანხა.
აღნიშნული ფინანსური დანახარჯების ანაზღაურების მიზნით, აშშ-ში საქართველოდან ექსპორტირებული ქართული წარმოშობის იმ სახეობის პროდუქციის განბაჟებისას, რომელზეც პრეფერენციული (GSP) რეჟიმი ვრცელდება, ტვირთის მფლობელმა საბაჟო დეკლარაციაში უნდა შეავსოს ე.წ. სპეციალური პროგრამის ინდიკატორის (special program indicators (SPI) გრაფა ,,A"-ს მითითებით"- აცხადებენ სამინისტროში.
