თავდაცვისა და განათლების ყოფილი მინისტრი დიმიტრი შაშკინი უკანონო სატელეფონო მოსმენების და ვიდეოგადაღებისგან საზოგადოების დაცვის გზებზე საუბრობს და აღნიშნავს, რომ ფარული ღონისძიებების განმახორციელებელი სამსახური ცალკე უწყებად უნდა ჩამოყალიბდეს. აღნიშნულთან დაკავშირებით დიმიტრი შასკინი სოციალურ ქსელში განცხადებას ავრცელებს, რომელსაც ,,ჯი-ეიჩ-ენი" უცვლელად გთავაზობთ: ,,როგორ უნდა იქნას დაცული საზოგადოება უკანონო სატელეფონო მოსმენებისაგან და ვიდეოგადაღებებისაგან?ერთ-ერთი გამომწვევი მიზეზი სატელეფონო მოსმენების, ვიდეო-გადაღებების, ელექტრონული კომუნიკაციების კონტროლის სამსახურისა და გამოძიების სამსახურების ერთ უწყებაში - შინაგან საქმეთა სამინისტროში არსებობაა, რა დროსაც მაღალია რისკი მაღალი თანამდებობის პირების მიერ ადამიანების პირად ცხოვრებაში ჩარევისა -დანაშაულის გამოძიებაზე პასუხისმგებელი მაღალი თანამდებობის პირები იმავდროულად ხელმძღვანელობენ და სრულად მიუწვდებათ ხელი ფარული ღონისძიებების ჩამტარებელი სამსახურების საქმიანობაზე. ზოგიერთი ქვეყნის გამოცდილების გათვალისწინებით, რომლის თვალსაჩინო მაგალითად მოგვყავს თურქეთის რესპუბლიკა, რეფორმატორთა კლუბი გთავაზობთ პრობლემის გადაჭრის შემდეგ გზებს:სატელეფონო მოსმენების, ვიდეო-გადაღებების, ელექტრონული კომუნიკაციების კონტროლის სამსახური გატანილი უნდა იქნას შსს სისტემიდან და შეიქმნას მისი დამოუკიდებლობის მყარი გარანტიები - სამსახურის უშუალო დაქვემდებარება პრეზიდენტის ან პრემიერ-მინისტრისადმი; გამოძიებას სამსახურთან უნდა ჰქონდეს მხოლოდ მკაცრად დაცული ელექტრონული კავშირი, დოკუმენტებს, სასამართლოს ბრძანებებს, მუშაობის შედეგებს ადრესატები ერთმანეთს უგზავნიან მხოლოდ ელექტრონული ფორმით; გამომძიებლებისთვის ცნობილი არ უნდა იყოს ასეთი ღონისძიებების ჩამტარებელ პირთა ვინაობა;
მიზანშეწონილია სამსახურის ადგილსამყოფელის საიდუმლოების უზრუნველყოფა; მასალა, რომელიც დაკავშირებული არ არის დანაშაულთან და შეეხება მხოლოდ პირად ცხოვრებას, უნდა განადგურდეს პერსონალურ მონაცემთა დაცვის ინსპექტორის ზედამხედველობით (დღეს ინსპექტორს ასეთი უფლებამოსილება არ გააჩნია);პირს, რომელსაც მიაჩნია, რომ სამსახურის საქმიანობის შედეგად დაირღვა მისი პირადი ცხოვრების ხელშეუხებლობის უფლება, საჩივრით შეუძლია მიმართოს საქართველოს პარლამენტის ნდობის ჯგუფს;
სამსახურის საქმიანობის გამჭვირვალობა:
ფარული ღონისძიებების განმახორციელებელი სამსახური წელიწადში ოთხჯერ მაინც საქმიანობის შესახებ ანგარიშს წარუდგენს პერეზიდენტს/პრემიერ-მინისტრს და პარლამენტს;პერეზიდენტს/პრემიერმინისტრის ან/და პარლამენტის გადაწყვეტილებით, სამსახურის საქმიანობას ამოწმებს პერსონალურ მონაცემთა დაცვის ინსპექტორი და შემოწმების შედეგებს წარუდგენს პერეზიდენტს/პრემიერმინისტრს და პარლამენტს;
რეფორმატორთა კლუბის მიერ შეთავაზებული რეფორმის ძირითადი შედეგები: გამოირიცხება უკანონო სატელეფონო მოსმენების, ვიდეოგადაღებების, ელექტრონული კონტროლის შესაძლებლობა;
პერსონალური ინფორმაციის გამჟღავნებაზე პასუხისმგებლობა დაეკისრება ერთ კონკრეტულ სამსახურს;
გაიზრდება მთლიანად სახელმწიფოს როლი პირადი ცხოვრების ხელშეუხებლობის დაცვის პროცესში", _ნათქვამია დიმიტრი შაშკინის განცხადებაში.