27 ივლისს, სიღნაღი საზამთროს ფესტივალს უმასპინძლებს. ფესტივალის ფარგლებში, სიღნაღში, გამგეობის წინ მდებარე მოედანზე პარალელურ რეჟიმში გაიმართება სხვადასხვა სახის გასართობი აქტივობა. როგორც ტურიზმის ეროვნულ ადმინისტრაციაში განმარტავენ, ფესტივალის ფარგლებში მოეწყობა მხიარული შეჯიბრებები (სირბილი საზამთროთი, ისრის სროლა საზამთროსთვის, შეჯიბრი საზამთროს ჭამაში, შეჯიბრი საზამთროს აზიდვაში, კეგლი საზამთროთი და სხვა ). გაიმართება ასევე, საზამთროს ფიგურების ჭრის სანახაობრივი ღონისძიება. მოედანზე განთავსებულ დახლებზე დამსწრე საზოგადოებას შეეძლება დააგემოვნოს საზამთრო, საზამთროს ფრეში, საზამთროს მურაბა. ფესტივალზე ადგილობრივი მწარმოებლები გამოფენენ ხელნაკეთ სუვენირებს. მოედანზე ასევე განთავსდება ფოტო სტენდები. ტერიტორიაზე იქნებიან "ბოდი-არტის" მხატვრებიც. საღამოს დაასრულებს გასართობი ღონისძიება ბავშვებისთვის ქართული ზღაპრის გმირების მონაწილეობით. საზამთროს ფესტივალი უკვე მეორე წელია ეწყობა და მისი ინიციატორი ტურიზმის ეროვნული ადმინისტრაციაა.
