20 ივლისს, ქალაქ გორში საქართველოს ფინანსთა მინისტრმა ნოდარ ხადურმა და ფინანსთა სამინისტროს მომსახურების სააგენტოს გენერალურმა დირექტორმა ზურაბ ახალკაციშვილმა ფინანსთა სამინისტროს მომსახურების სააგენტოს ახალი სავაჭრო ობიექტი „კალათა" გახსნეს.
მაღაზიაში ხელმისაწვდომ ფასებში იყიდება საყოფაცხოვრებო ნივთები და სამეურნეო საქონელი.
„დღეს გორში გავხსენით ფინანსთა სამინისტროს მომსახურების სააგენტოს ახალი მაღაზია. მაღაზიაში გორელებს და შიდა ქართლის მოსახლეობას საშუალება ექნება შედარებით იაფად ხარისხიანი პროდუქცია შეიძინოს. ჩვენი ამოცანაა, რომ სახელმწიფო სერვისებით, სახელმწიფო მომსახურებით რაც შეიძლება მეტმა ადამიანმა ისარგებლოს და ამიტომ ვცდილობთ ასეთი მაღაზიები გავხსნათ. გორი არის მეხუთე ქალაქი, სადაც სააგენტოს მაღაზია გაიხსნა. წარმატებას ვუსურვებ ამ სამსახურს. მიმაჩნია, რომ ასეთი ქსელით ჩვენ შევძლებთ კონკურენცია გავუწიოთ არაორგანიზებულ ვაჭრობას," - განაცხადა ფინანსთა მინისტრმა ნოდარ ხადურმა.
ფინანსთა სამინისტროს მომსახურების სააგენტოს გენერალური დირექტორის, ზურაბ ახალკაციშვილის განცხადებით, მომსახურების სააგენტოს მთავარი მიზანია, მომხმარებლისთვის კომფორტული და მოსახერხებელი მომსახურების შეთავაზება.
ფინანსთა სამინისტროს მომსახურების სააგენტოს ახალი მაღაზიის გახსნა მომხმარებელთა დიდმა ინტერესმა, ხარისხმა და ხელმისაწვდომმა ფასებმა განაპირობა. სავაჭრო ობიექტში სამი ადგილობრივი მაცხოვრებელი დასაქმდა.
