,,ადეკვატური იქნებოდა, რუსებს არა თუ გაევლოთ მავთულხლართები, არამედ რაც აქამდე ღობეები ააგეს, ისიც დაენგრიათ", -განაცხადა ჟურნალისტებთან პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა რუსი სამხედროების მიერ საოკუპაციო ზოლთან განვითარებული პროცესების კომენტირებისას.
მისივე განმარტებით, რუსი სამხედროების ქმედებები ხელს უშლის რუსეთთან ურთიერთობის ნორმალიზებას.
"იმ ფონზე, როცა პოზიტიურ ნაბიჯებს ჰქონდა ადგილი, ეკონომიკური თუ კულტურული ურთიერთობების თვალსაზრისით, ეს დესტრუქციული ქმედებები ამ პროცესს ხელს უშლის, ასევე აზიანებს რუსეთის იმიჯს, რადგან მთელი მსოფლიო ხედავს, რომ ჩვენი მხრიდან მხოლოდ პოზიტიურ სიგნალებს აქვთ ადგილი", -განაცხადა სესიაშვილმა.
შეგახსენებთ, რომ რამდენიმე დღეა რაც რუსმა სამხედროებმა საოკუპაციო ზოლის მიმდებარე ტერიტორიაზე მავთულხლართების გაბმის პროცესი ისევ განახლეს.
