საქართველოს პრემიერ-მინისტრი ბიძინა ივანიშვილი დღეს "TATA Group"-ის ხელმძღვანელთა ჯგუფს შეხვდა. შეხვედრას ასევე ესწრებოდნენ საქართველოს ენერგეტიკისა და ბუნებრივი რესურსების მინისტრი კახა კალაძე და გარემოსა და ბუნებრივი რესურსების მინისტრი ხათუნა გოგალაძე.
შეხვედრაზე მხარეები აჭარის წყალზე მიმდინარე ჰიდროელექტრო სადგურის პროექტის გარდა სხვა შესაძლო ინვესტიციების საკითხიც განიხილეს.
საქართველოში ინვესტორთა ჯგუფის ვიზიტს და შეხვედრების ორგანიზებას საქართველოს ეროვნული საინვესტიციო სააგენტო უწევს.
ინვსეტორთა სამუშაო ჯგუფს, რომელშიც საერთაშორისო საფინანსო კორპორაციისა (IFC) და ნორვეგიული კომპანია „Clean Energy"-ის წარმომადგენლებიც შედიან, კომპანია „TATA Power"-ის აღმასრულებელი დირექტორი ხელმძღვანელობს.
„TATA Group"-ი წარმოადგენს ინდოეთის უმხსვილეს მულტინაციონალურ მრავაპროფილურ კომპანიას, რომლის შტაბ-ბინა განთავსებულია მუმბაიში, ინდოეთი. ჯგუფი დაფუძნდა 1868 წელს და დღეს 100-მდე კომპანიას აერთიანებს, რომლებიც საქმიანობას მსოფლიოს 80-ზე მეტ ქვეყანაში ეწევიან. კომპანიის საქმიანობა მოიცავს სხადასხვა ბიზნეს სექტორს: მანქანათმშენებლობა, ენერგეტიკა, ქიმიური მრეწველობა, მეტალურგია, კომუნიკაციები და საინფორმაციო ტექნოლოგიები, სასტუმროების ბიზნესი, სასმელების წარმოება, ვაჭრობა, საკონსულტაციო მომსახურება და სხვა.