"დინამო არენას" მიმდებარე ტერიტორიაზე ახალგაზრდების მიერ გამართული საპროტესტო აქცია 100 %-ით გამართლებული იყო", _ განაცხადა მიხეილ სააკაშვილმა სპეციალურ მიმართვაში, რომლითაც ,,დინამო არენასთან" განვითარებულ პროცესებს გამოეხმაურა.
მისივე განმარტებით, საქართველოში ჩამოიყვანეს რუსეთის დუმის ის დეპუტატი, რომელსაც ხმა აქვს მიცემული ჩვენი ქვეყნის დანაწევრებისთვის.
"ის, რაც გუშინ მოხდა "თბილისის დინამოს" სტადიონზე და რაც გრძელდება დღეს ძალიან ბევრს მეტყველებს იმაზე, თუ რა მდგომარეობაში იმყოფება დღეს საქართველო, რა გამოწვევებისა და საფრთხეების წინაშე ვიმყოფებით და რა რისკები არსებობს, თუ ეს გაგრძელდება. გუშინ იყო ფეხბურთის მატჩი, ჩვენ მივესალმებით და მე პირადად მივესალმები და პოზიტიურ მოვლენად მივიჩნევ ასეთ მატჩებს - მე ვიყავი ინიციატორი, რომ რუსი ტურისტებისთვის ცალმხრივად გამარტივებულიყო სავიზო რეჟიმი საქართველოში. მე კმაყოფილი ვარ, როცა არის კულტურული და სპორტული კონტაქტები, ტურისტების დონზე, ეს ხელს უწყობს ხალხთა შორის ურთიერთგაგებას, ეს კარგი ჩვენი უსაფრთხოებისთვის, ეს კარგია ჩვენი ეკონომიკისთვის, მაგრამ გუშინ დავანებოთ თავი იმას, რა ლოზუნგებით ჩამოვიდნენ გულშემატკივრები, ეს შეიძლება მოხდეს, მაგრამ გუშინ საქართველოში ჩამოიყვანეს რუსეთის დუმის დეპუტატი, რომელსაც ხმა აქვს მიცემული ჩვენი ქვეყნის დანაწევრებისთვის 2008 წელს. რომელსაც ხმა აქვს მიცემული აფხაზეთის და ცხინვალის ე.წ. დამოუკიდებლობისთვის. ეს კაცი იბრძოდა და აქტიურად მონაწილეობდა აფხაზეთის ომში საქართველოს წინააღმდეგ, აქტიურად არის დაკავშირებული რუსეთის სპეცსამსახურებთან და პრაქტიკულად არის საქართველოს დაუძინებელი მტერი, ერთ-ერთი პასუხისმგებელი პირი საქართველოს დაქუცმაცების მცდელობაზე. ამიტომ ერთია, როცა ქვეყანაში უშვებ ტურისტს, სპორტსმენს და ამას უნდა მივესალმოთ და მეორე - საქართველოს მტერს", - განაცხადა მიხეილ სააკაშვილმა.
მისივე განმარტებით, ამ კატეგორიის დეპუტატის საქართველოში ჩამოყვანა დაუშვებელია.