10 წლის გოგონას გაუპატიურებაში ბრალდებულ 54 წლის მამაკაცს, სიღნაღის სასამართლომ წინასწარი პატიმრობა შეუფარდა. როგორც სიღნაღის რაიონულმა პროკურორმა თენგიზ ჩიტიაშვილმა კახეთის საინფორმაციო ცენტრს განუცხადა, მამაკაცს ბრალი სამი მუხლით წარედგინა, რაც გაუპატიურებას, ცემას და გარყვნილ ქმედებას გულისხმობს.
„გამოძიება 140-ე მუხლით დაიწყო, რაც 16 წელს მიუღწეველ პირთან სქესობრივი კავშირის დამყარებას გულისხმობს, თუმცა მისი დაკავება 141-ე მუხლით, გარყვნილი ქმედების ჩადენის ბრალდებით მოხდა. საბოლოოდ კი ბრალი წარედგინა, 141-ე მუხლის 1-ელი ნაწილით, 137-ე მუხლის მე-5 ნაწილით და 125-ე მუხლით, რაც ცემას გულისხმობს. 137-ე მუხლი ძალიან მკაცრ სანქციებს ითვალისწინებს, სასჯელის ზომა 12 წლიდან იწყება", - განუცხადა კახეთის საინფორმაციო ცენტრს თენგიზ ჩიტიაშვილმა.
შეგახსენებთ, სამართალდამცავებმა 2013 წლის 4 ივლისს, სიღნაღის რაიონში, 54 წლის მამაკაცი დააკავეს. შს სამინისტროს ინფორმაციით, დაკავებულმა 2013 წლის 2 ივლისს, ერთ-ერთ სოფელში, საკუთარ საცხოვრებელ სახლში სქესობრივი კავშირი დაამყარა 2003 წელს დაბადებულ გოგონასთან. სოფლის ტერიტორიული ორგანოს რწმუნებულის თქმით, მამაკაცი გოგონას ნათლიაა.