საგარეო უწყებამ სეპარატისტების მიერ ავტოსატრანსპორტო საშუალებების ოკუპირებულ ტერიტორიებზე გადაადგილების აკრძალვასთან დაკავშირებით რეაგირებისთვის საერთაშორისო თანამეგობრობას მიმართა. როგორც ჟურნალისტებთან ორშაბათის ტრადიციულ ბრიფინგზე საგარეო საქმეთა მინისტრის მოადგილემ დავით ჯალაღანიამ განაცხადა, ოსი სეპარატისტები მიერ მიღებული გადაწყვეტილება უკანონოა.
,,ყველა აქტი, რომელიც გამოცემულია ადგილობრივი მარიონეტული და საოკუპაციო რეჟიმის მიერ არის თავისთავად უკანონო, არალეგალური, მათ შორის ეს გადაწყვეტილება", _განაცხადა ჯალაღანიამ და აღნიშნა, რომ მომხდარ ფაქტთან დაკავშირებით საერთაშორისო თანამეგობრობას მიმართეს.
,,საგარეო საქმეთა სამინიტრომ დაუყოვნებლივ მიმართა ჟენევის მოლაპარაკების პროცესში მონაწილე თანათავმჯდომარეებს შესაბამისი რეაგირებისთვის და ასევე გათვალისწინებულია მიემართოს საერთაშორისო თანამეგობრობას, ევროკავშირის, გაეროს, ეუთოს რათა მათი მხრიდან იყოს ადეკვატური რეაგირება და გაკეთდეს შესაბამისი მცდელობა ამ უკანონო გადაწყვეტილების აღკვეთის მიზნით", _განაცხადა ჯალაღანიამ.
შეგახსენებთ, რომ ოსი სეპარატისტები ცხინვალის რეგიონში „მეზობელი საქართველოდან" ავტოსატრანსპორტო საშუალებებს სექტემბრიდან აღარ შეუშვებენ. აღნიშნული დადგენილება სეპარატისტთა მთავრობამ უკვე მიიღო.
სეპარატისტები იუწყებიან, რომ მითითებული პერიოდის შემდეგ შესაბამისად შეწყდება ავტომობილებით საქონლისა და ტვირთების შეტანა.
„ადამიანებს, რომელთაც სახელმწიფო საზღვრის გადალახვის სურვილი ექნებათ საზღვრის ფეხით გადავლა მოუწევთ.
სასაზღვრო პუნქტების გავლით ნებადართული იქნება მხოლოდ იმ ნივთების გადატანა, რომლებიც პირადი მოხმარების საგნებს განეკუთვნება", _ იუწყებიან სეპარატისტები.
მათივე ინფორმაციით, „ჯერ ჯერობით საზღვრის გადაკვეთის გამარტივებული რეჟიმი არსებობს, იმისათვის რათა ადამიანები მიეჩვიონ ცნებას „სახელმწიფო საზღვარი".
იქნება ორი ე.წ. სასაზღვრო პუნქტი. ერთი სოფელ რიკში ხოლო მეორე სოფელ ერგნეთში.