თბილისის მერიისა და საკრებულოს დაკავებული წარმომადგენლები, მომხდარს გაასაჩივრებენ და დამნაშავე პირთა დასჯას მოითხოვენ. შესაბამისი განცხადება მერიის იურიდიული სამსახურის უფროსმა ირაკლი აბესაძემ გააკეთა, რომელმაც ინციდენტის პოლიტიკურ მოტივაციაზე გაამახვილა ყურადღება.
„ჩვენ ვფიქრობდით, რომ საქართველოს ფინანსთა სამინისტროს აღიარებდა მათ მიერ დღეს ჩადენილ აშკარა უკანონო ქმედებებს და დაიწყებდა საქმის გამოძიებას, თუმცა მათ ამის მაგივრად გააგრძელეს თბილისის მერიის თანამდებობის პირებისა და საკრებულოს წევრების პოლიტიკური დევნა და გაავრცელეს ბანკომატის კამერით ავტომატურ რეჟიმში გადაღებული არაფრის მთქმელი კადრები. საგულისხმოა, რომ მსგავსი კადრები არსებობს ნებისმიერი პენსიონერის მიმართაც კი, რომელიც კუთვნილ პენსიის გამოტანას ბანკომატიდან ახორციელებს. სრულიად აბსურდულია, საგამოძიებო ორგანოს მტკიცება, რომ თითოეულმა მათგანმა ბანკომატიდან პლასტიკური ბარათის გამოყენებით მილიონობით ლარი გამოიტანა, რადგან ყველასათვის ცნობილია, რომ ბარათს გააჩნია განაღდების ლიმიტი და ეს შეუძლებელია. გავრცელებული კადრების, როგორც მტკიცებულებების აბსურდულობას და მიმდინარე გამოძიების მხოლოდ პოლიტიკური ზეწოლის მეთოდად გამოყენებას ადასტურებს თავად საგამოძიებო ორგანოების მოქმედებაც, რომლებმაც ყველა დაკავებული ბრალის წარდგენის გარეშე გაათავისუფლეს.
ფაქტია, რომ თვეების განმავლობაში საგამოძიებო ორგანოების მთავარი ამოცანაა თბილისის თვითმმართველობის თანამდებობის პირების პოლიტიკური დევნა. ამის დადასტურებაა დღევანდელი დღეც. მაღალი დონის პოლიტიკური შეკვეთის არარსებობის პირობებში, წარმოუდგენელია ჩვენი 23 თანამშრომლის მიმართ საგამოძიებო სამსახურის 150-მდე თანამშრომელს ერთდროულად ჩაეტარებინა ამ მასშტაბის უკანონო ოპერაცია. ამასთან, მიუხედავად იმისა, არის თუ არა ჩადენილი დანაშაული დღეს უკანონოდ დაკავებული თანამდებობის პირების მიერ, მათი უფლებების ასეთ უხეშად დარღვევას და დაკავებისას კანონმდებლობის არაერთი მუხლის უგულებელყოფას, გამართლება არ აქვს და ეს უნდა იქნეს სათანადოდ გამოძიებული. დღეს უკანონოდ დაკავებული თითოეული
პირის სახელით მომზადდება საჩივარი, იმისათვის რომ ეს საქმე იყოს გამოძიებული და დამნაშავე პირები დასჯილი", - განაცხადა აბესაძემ.