,,საერთაშორისო გამჭვირვალობა საქართველოს" ინფორმაციით, მიხეილ სააკაშვილმა ლევან ქარდავას ერთ ლარად მიწის ნაკვეთი გადასცა. აღნიშნულთან დაკავშირებით არასმთვარობო ორგანიზაცია განცხადებას ავრცელებს, რომელსაც ,,ჯი-ეიჩ-ენი" უცვლელად გთავაზობთ: ,,საქართველოს პრეზიდენტმა 2013 წლის 20 ივნისს გაავრცელა განცხადება, რომელშიც ძალოვანი უწყებების ორ ყოფილ თანამშრომელს დავით ჩხატარაშვილს და ლევან ქარდავას წამების ფაქტების ორგანიზებაში დასდო ბრალი. ამავე განცხადებაში პრეზიდენტმა აღნიშნა, რომ იგი პირადად არ იცნობდა და არც იცოდა ვინ იყვნენ ეს პიროვნებები.
„საერთაშორისო გამჭვირვალობა-საქართველო" სწავლობს 2005-2012 წლებში პრეზიდენტის მიერ პირდაპირი განკარგვის წესით კერძო პირებისთვის სიმბოლურ თანხად 1 ლარად გადაცემულ ქონებას.
დოკუმენტაციის შესწავლისას გამოიკვეთა კერძო პირთა სია, რომლებსაც უსასყიდლოდ და ყოველგვარი საინვესტიციო პირობის გარეშე გადაეცათ ქონება.
აღნიშნულ პირთა სიაში შედის პრეზიდენტის მიერ ხსენებული ლევან ქარდავა. 2011 წლის 16 ნოემბერს პრეზიდენტის #16/11/05 განკარგულებით ლევან ქარდავას 1 ლარად გადაეცა 2501 კვადრატული მეტრი არასასოფლო-სამეურნეო დანიშნულების მიწის ნაკვეთი კოჯორში (საკადსტრო კოდი: 81.01.06.325). აღნიშნული ქონება საჯარო რეესტრის ეროვნული სააგენტოში ლევან ქარდავას სახელზეა რეგისტრირებული და მის თანამდებობრივ დეკლარაციაშიაც არის აღნიშნული", _ნათქვამია განცხადებაში.
