თბილისის საქალაქო სასამართლოს პრეს-სპიკერის თამარ მაისურაძის განცხადებით, სასამართლოში ბრალდების მხარის მიერ წარმოდგენილ იქნა შუამდგომლობა ბრალდებულების მიმართ, ცეცხლსასროლი იარაღის, საბრძოლო მასალის, ფეთქებადი ნივთიერებისა და ასაფეთქებელი მოწყობილობის მართლსაწინააღმდეგო შეძენა-შენახვისათვის და არა, როგორც მედიასაშუალებებში იქნა გავრცელებული- ტერორისტული აქტის მომზადების მცდელობისათვის.
წარდგენილი ბრალდების თანახმად, ბრალდებულებმა გამოძიებით დაუდგენელ დროსა და ვითარებაში მართლსაწინააღმდეგოდ შეიძინეს 9 მმ კალიბრის მაკაროვის სისტემის პისტოლეტი-N TH 2340, ამავე კალიბრის 8 ცალი ვაზნა, 2253, 83 გრამი ჰექსოგენის შემცველი ფეთქებადი ნივთიერება, 25 ცალი ელექტროდეტონატორი, რასაც ასევე მართლსაწინააღმდეგოდ ინახავდნენ ქ. თბილისში, ბოჭორმის ქუჩაზე მდებარე დროებით საცხოვრებელ ბინაში. 2013 წლის 13 ივნისს, შსს კონტრტერორისტული ცენტრის თანამშრომელთა მიერ ჩატარებული, ბრალდებულთა დროებითი საცხოვრებლის ჩხრეკისას, ზემოთხსენებული ცეცხლსასროლი იარაღი და საბრძოლო მასალა ამოღებულ იქნა მიკაილ კადიევის საწოლის მატრასის ქვევიდან, ხოლო ფეთქებადი ნივთიერება და ასაფეთქებელი მოწყობილობა რივზან ომაროვის სხვა პირად ნივთებთან ერთად მისი კუთვნილი ჩანთიდან.
აღკვეთის ღონისძიების კონკრეტული სახის შერჩევისას სასამართლო გაეცნო საქმეში წარმოდგენილ მასალებს, მოისმინა მხარეთა ახსნა-განმარტებები და მიუხედავად იმისა, რომ ბრალდებულებს ბრალად ედებათ ნაკლებად მძიმე კატეგორიის დანაშაულის ჩადენა, რომელიც სასჯელის სახედ და ზომად ითვალისწინებს ჯარიმას ან თავისუფლების აღკვეთას 6 თვიდან 3 წლამდე ვადით, მიიჩნია რომ შუამდგომლობა უნდა დაკმაყოფილდეს, ვინაიდან ბრალდებულები არიან უცხო ქვეყნის მოქალაქეები, შესაბამისად მათ გააჩნიათ კავშირები საზღვარგარეთ, არ აქვთ საქართველოში მუდმივი საცხოვრებელი ადგილი, ამასთან, დროებითი საცხოვრებლის ჩხრეკისას ამოღებული იქნა ბრალდებულ მიკაილ კადიევის სახელზე გაცემული სავარაუდოდ ყალბი პასპორტი. ამდენად, არსებობს მათი მხრიდან მიმალვის საფრთხე. სასამართლომ მხედველობაში მიიღო, რომ ასევე ამოღებულია დიდი ოდენობით ფეთქებადი ნივთიერებები და ასაფეთქებელი მოწყობილობები, შესაბამისად დასადგენია მათი ოდენობა, სახეობა და მათი წარმომავლობა. საქმეზე ჩასატარებელია მთელი რიგი საგამოძიებო მოქმედებანი საქმეზე საბოლოო ჭეშმარიტების დასადგენად.

აღნიშნულ საქმეზე წინასასამართლო სხდომა გაიმართება 2013 წლის 31ივლისს 11 საათზე.