,,არ შეიძლება იუსტიციის მინისტრმა ასეთი შეურაცხყოფა მიაყენოს მოსამართლეს", _ განაცხადა ჟურნალისტებთან უზენაესი სასამართლოს თავმჯდომარე კოტე კუბლაშვილმა თეა წულუკიანის განცხადების კომენტირებისას.
"მინისტრის გამონათქვამი მე არ მომისმენია, მაგრამ ეს თუ ასეა, ეს არის ბატონი ზაზა მეიშვილის შეურაცხყოფა, რაც იუსტიციის მინისტრის მხრიდან მიუღებელი და დაუშვებელია. ვფიქრობ, იგი მიხვდება, რომ არ შეიძლება ასეთი შეურაცხყოფა მიაყენოს მოსამართლეს, რომელიც რაც სასამართლო სისტემაში მუშაობს, გამოირჩევა წესიერებითა და პროფესიონალიზმით. რაც შეეხება თავად პროცესს, ვერავინ იტყვის, რომ რაიმე იყო დამალული და რაღაც კულუარულად ხდებოდა. ის, რაც კულუარულად მანამდე ხდებოდა, ჯერ კიდევ განხილვის საკითხია და ამ ადამიანებმა, მათ შორის მინისტრმა, ამაზეც უნდა ისაუბრონ. მოსამართლეთა კონფერეციამ, მისი მომზადების პროცესმა აბსოლუტური საჯაროობის პირობებში ჩაიარა", -განაცხადა კუბლაშვილმა.
შეგახსენებთ, რომ თეა წულუკიანის განცხადებით, მოსამართლეებმა უცნაური გადაწყვეტილება მიიღეს.
,,მოსამართლეებმა მართალია, უცნაური გადაწყვეტილებები მიიღეს, მაგრამ მიიღეს ის, რაც ჩათვალეს, რომ კარგია. ახლა ეს გადაწყვეტილებები საჭიროებს შემოწმდეს პრაქტიკაში, რათა დავინახოთ, რამდენად თავისუფალი და დამოუკიდებელი საქმიანობა შეუძლიათ იმ ადამიანებს, ვინც აირჩიეს. რა თქმა უნდა, გასაოცარია, რომ ყველაზე ოდიოზური ფიგურა, რომელიც ასეთად მოიაზრება საზოგადოებაში, პირველივე ტურში - უპრობლემოდ იქნა არჩეული", - განაცხადა თეა წულუკიანმა.