დღეს, 24 მაისს 19 საათზე დედაენის ძეგლთან ორი აქციაა დაგეგმილი. ერთი ჯგუფი ატარებს აქციას მოწოდებით: "არა თეოკრატიას!", ხოლო პარალელურად გაიმართება არასამთავრობო ორგანზიაცია "ეროვნული ფრონტის" ატარებს აქცია მოთხოვნით: "აიკრძალოს ლგბტ პროპაგანდა!!!"
"არა თეოკრატიას!" აქციის ორგანიზატორები აცხადებენ, რომ 17 მაისს, რელიგიურმა ფუნდამენტალიზმმა ყველაზე აგრესიული და მასშტაბური ფორმით გამოააშკარავა თავი საქართველოში.
"მოგიწოდებთ ყველას მოხვიდეთ აქციაზე და მოითხოვოთ კონსტიტუციაზე დაფუძნებულ სახელმწიფოში ცხოვრება, სადაც კანონის წინაშე ყველა თანასწორია - არა თეოკრატიას!!!", - აღნიშნულია ორგანიზატორთა განცხადებაში.
მათივე განმარტებით აქცია "არა თეოკრატიას!!!" არავითარი კავშირი არ აქვს სექსუალური უმცირესობების აღლუმთან.
"არავითარ გეი აღლუმზე საუბარი არაა. ესაა საზოგადოების დაბნევისა და შეცდომაში შეყვანის მიზნით ოპონენტებისა და აგრესიულად განწყობილი ჯგუფების მიერ მოგონილი თემა", - აცხადებენ ორგანიზატორები.
აქცია "აიკრძალოს ლგბტ პროპაგანდა!!!" ორგანიზატორების თქმით კი სექსუალურ უმცირესობათა წარმომადგენლები და მათი მხარდამჭერი ფსევდო-ლიბერალები დედაენის ბაღში ატარებენ ფართომასშტაბიან აქციას ლოზუნგით: "არა თეოკრატიას!".
ამავე დღეს, 18 საათზე, ქართველ პატრიოტთა არასამთავრობო ორგანზიაცია "ეროვნული ფრონტი" ატარებს აქციას მოთხოვნით: "აიკრძალოს ლგბტ პროპაგანდა!!!"
"ეროვნული ფრონტი" თვლის, რომ 17 მაისს ორგანიზაცია "იდენტობის" მიერ ორგანიზებული აქცია ატარებდა პროვოკაციულ ხასიათს და შეიცავდა ქართულ საზოგადოებაში მისთვის მიუღებელი ფასეულობების და ღირებულებების ძალადობრივად თავსმოხვევის მცდელობას, რამაც 17 მაისს საზოგადოების მწვავე რეაქცია გამოიწვია.
„გლობალისტური ეკონომიკური კლანების გრანტებით ნასაზრდოები ფსევდო-ლიბერალური ფრთა ცდილობს 17 მაისის მოვლენები გადააბრალოს საქართველოს მართლმადიდებელ ეკლესიას და სასულიერო პირებს, რაც ისევ და ისევ ქართულ საზოგადოებაზე იდეოლოგიური ძალადობის ელემენტებს შეიცავს", - ნათქვამია "ეროვნული ფრონტის" განცხადებაში.
აქციის მიმდინარეობისას დედა ენის ძეგლთან მობილიზებული იქნება პოლიცია.