ალკოჰოლური სასმელების წარმოების დეტალურ ციკლს და საინვესტიციო გეგმებს მედიას კომპანიის ერთ-ერთი დამფუძნებელი ჯიმშერ ჩხაიძე ასკანელი, გენერალური დირექტორი ირაკლი ბექაური და ლაბორატორიის უფროსი თეა ქიტუაშვილი გააცნობენ.

ქარხანა, რომელსაც ჟურნალისტები დაათვალიერებენ 2005 წელს აშენდა და მასში 5 მილიონი ლარი ინვესტიცია ჩაიდო. მისი წარმადობა ერთ სამუშაო დღეში 25 000 ბოთლს შეადგენს. ქარხანა აღჭურვილია Gavagnino&Gatti-ს და Fimer-ის იტალიური წარმოების უახლესი დანადგარებით და გერმანული ბრენდის ZEITZ -ის ფილტრაციის სისტემით. ქარხანას გააჩნია ბრენდის და ჭაჭის სახდელი თანამედროვე აპარატურა. საკონიაკე სპირტები და სამარკო ღვინოები ინახება მუხის კასრებში. წარმოების პროცესის ყველა ეტაპის მკაცრი კონტროლი (მთელი ციკლი ყურძნის მიღებიდან ჩამოსხმამდე და საექსპორტოდ გაგზავნამდე), ასევე სიცივით დამუშავება მაღალი ხარისხისა და ფართო ასორტიმენტის ღვინისა და კონიაკის წარმოების საშუალებას იძლევა. ქარხანაში ფუნქციონირებს უნიკალური და უძველესი სახდელი, რომელშიც კონიაკის გამოხდა ფრანგული მეთოდით მიმდინარეობს.

რაც შეეხება ხარისხის კონტროლს, როგორც ქარხნის ლაბორატორიის უფროსი თეა ქიტუაშვილი აცხადებს, ხარისხის კონტროლი მუდმივად ხორციელდება და იწყება იმ ნიადაგის შესწავლით, სადაც იზრდება ყურძენი. ლაბორატორია იკვლევს რა რეაქტივებით იწამლება ყურძენი ნაადრევ ეტაპზე, შემდეგ სისტემატურად სიმწიფეში შესვლისას, იღებს საერთო შაქრიანობის ანალიზს, დუღილის დროს მუდმივად ამოწმებს ქიმიურად და გემოზე. „შემოწმების მეთოდები გოსტირებულია და სასმელი გადის შემოწმებას არა მხოლოდ ჩვენთან, არამედ ვაგზავნით ნიმუშებს აკრედიტირებულ ლაბორატორიაში გადაკონტროლებისათვის. დამოუკიდებელ და სერტიფიცირებულ ლაბორატორიაში ვიღებთ სერტიფიკატებს, რათა ნებისმიერ ქვეყანაში გვქონდეს პროდუქციის გაგზავნის უფლება. რაც მთავარია, ვირჩევთ მხოლოდ მაღალხარისხიან წითელ და თეთრ ყურძენს დასავლეთ და აღმოსავლეთ საქართველოს რეგიონებიდან. ალკოჰოლური დუღილის პროცესში ვიყენებთ სპეციალურ საფუვრებს, რომლებიც უზრუნველყოფენ ალკოჰოლური ფერმენტაციის საიმედოობას და ამცირებენ ფერმენტაციის შედეგად არასასიამოვნო არომატების წარმოქმნას. ჩვენ ვიყენებთ მხოლოდ იმ პრეპარატებს, რომლებიც უზრუნველყოფენ მაღალხარისხიანი სასმელების მიღებას" -აცხადებს თეა ქიტუაშვილი.

ხარისხთან დაკავშირებით „ასკანელი ძმები"-ს მედლებისა და ჯილდოების კოლექციას ამ დღეებში შეემატა „Decanter 2013 World Wine Awards"-ის სამი ახალი აღიარება. ლონდონში დეკანტერის საერთაშორისო ღვინის 2013 წლის ფესტივალზე დაჯილდოვდა ღვინოები „ცოლიკაური 2012 წლის მოსავალი", „როზე 2012 წლის მოსავალი" და „საფერავი 2011 წლის მოსავალი".

რაც შეეხება კომპანიის გეგმებს, როგორც „ასკანელი ძმების" ერთ-ერთი დამფუძნებელი ჯიმშერ ჩხაიძე ასკანელი აცხადებს, იგეგმება საწარმოო სიმძლავრეების გაზრდა. „ახალი საამქრო ამჟამად პროექტირების ეტაპზეა. მშენებლობა, რომელშიც 3 მილიონი ლარის ინვესტიცია ჩაიდება, უახლოეს მომავალში დაიწყება და ISO სტანდარტების სრული დაცვით წარიმართება. ახალი საწარმოო ხაზი გათვლილი იქნება როგორც არსებული ბაზრების მზარდი მოთხოვნის დაკმაყოფილებაზე, ასევე ახალი ბაზრების მოძიებაზე, ასორტიმენტის გაზრდაზე და ასკანელის სავაჭრო ნიშნის ღირსეული სახელით დამკვიდრებაზე მსოფლიო ბაზარზე" - აღნიშნავს იგი.

კომპანიას „ასკანელი ძმები" მუდმივად უწევენ კონსულტაციას უცხოელი სახელოვანი სპეციალისტები. მათ შორის: ივან პრიდა - პროფესორი, მოლდავეთის დამსახურებული მეღვინე, მილოშ მიხლოვსკი - ცნობილი ჩეხი პროფესორი, დეგუსტატორი და ფრანგი სომელიე, ღვინის სპეციალისტი - ჰიუგ ბო.

ასევე სისტემატურად იმაღლებენ კვალიფიკაციას ქარხნის სპეციალისტები, რომლებიც გადამზადებას ევროპაში გადიან. ტრენინგები მოწვეული ამერიკელი და გერმანელი ტექნოლოგებისა და სპეციალისტების მიერ მათთვის საქართველოშიც იმართება.

კომპანია იცავს მაღალ სტანდარტებს და აკმაყოფილებს სხვადასხვა ბაზრის მოთხოვნებსა და პარამეტრებს. „ასკანელი ძმები"-ს მიერ წარმოებული სასმელები გადის ექსპორტზე აშშ-ში, უკრაინაში, ჩინეთში, გერმანიაში, დიდ ბრიტანეთში, ესტონეთში, ლიტვაში, ლატვიაში, პოლონეთში, ჩეხეთში, ყაზახეთში, ფინეთში, აზერბაიჯანში და ბელორუსიაში.

კომპანია „ასკანელი ძმები" 15 წლის წინ დაარსდა და სადღეისოდ ერთ-ერთი წამყვანი კომპანიაა ქართული ელიტარული ალკოჰოლის მწარმოებელ კომპანიებს შორის. კომპანია აწარმოებს 8 სახეობის კონიაკს, 32 დასახელების ღვინოს, 4 დასახელების ჭაჭას. „ასკანელი ძმების" პროდუქცია აღიარებულია საუკეთესოდ და მიღებული აქვს 100-ზე მეტი ჯილდო სხვადასხვა გამოფენებსა და დეგუსტაციებზე.

ცნობისთვის: კომპანიის ისტორია სათავეს ბევრად უფრო ადრე, 1880 წელს გურიის სოფელ ასკანაში იღებს და ანთიმოზ ჩხაიძეს უკავშირდება, რომელმაც ასკანაში ღვინის მარანი დაარსა. მის მიერ დამზადებული ღვინოები მრავალფეროვნებითა და განსაკუთრებული არომატით გამოირჩეოდნენ. ანთიმოზ ჩხაიძის შთამომავლებმა გააგძელეს წინაპრის ტრადიცია და დღეს საქართველოსა და მსოფლიოს საუკეთესო ღვინოსა და ბრენდის სთავაზობენ.