საქართველოს საგარეო საქმეთა მინისტრი მაია ფანჯიკიძე უნგრეთში ოფიციალური ვიზიტის ფარგლებში უნგრეთის პარლამენტის თავმჯდომარეს შეხვდა. მხარეებმა ორი ქვეყნის ურთიერთობები, პოლიტიკური და ეკონომიკური თანამშრომლობის პერსპექტივები და საქართველოს ევროკავშირთან და ნატოსთან თანამშრომლობის საკითხები განიხილეს. როგორც შეხვედრის დასრულების შემდეგ უნგრეთის პარლამენტის თავმჯდომარემ ლაზლო კოვერიმ განაცხადა უნგრეთმა სრულიად ახალი კურსი დაიწყო ორ ქვეყანას შორის ურთიერთობის განვითარების მიმართულებით ‘'აუცილებელია ცვლილებები აისახოს ყველა დონეზე და არა მხოლოდ უმაღლეს პოლიტიკურ დონეზე''-აღნიშნა უნგრეთის პარლამენტის თავმჯდომარემ.
შეხვედრაზე საუბარი შეეხო ასევე უნგრეთისა და საქართველოს პარლამენტების თანამშრომლობის პერსპექტივას. უნგრეთის პარლამენტის თავმჯდომარის განცხადებით უნგრეთის საკანონმდებლო ორგანო მზად არის საქართველოს პარლამენტს გამოცდილება გაუზიაროს. ,,ბოლო 20 წლის განმავლობაში უნგრეთმა საკმაოდ დიდი გამოცდილება დააგროვა და მას შესანიშნავი შესაძლებლობა აქვს ეს გამოცდილება ქართველ პარლამენტარებსაც გაუზიაროს. ამასთან, უნგრეთის პარლანეტს გააჩნია ძალზედ ძლიერი ოფიციალური ადმინისტრაცია. ჩვენ ვანხორციელებთ პროგრამას, ეს არის ერთგვარი ევროპული დაძმობილების პროგრამა, რომლის ფარგლებშიც ევროპელი და უნგრელი პარლამენტარები, რომლებიც ამ ადმინისტრაციის ნაწილს ქმნიან, ეხმარებიან სხვა ქვეყნებს ევროატლანტიკური ინტეგრაციის მიმართულებით"- განაცხადა ლასლო კოვერიმ.
შეგახსენებთ საქართველოს სააგრეო საქმეთა მინისტრი უნგრეთში ოფიციალური ვიზიტით იმყოფებოდა. მაია ფანჯიკიძემ შეხვედრა გამართა უნგრეთის საგარეო საქმეთა მინისტრთან, პარლამენტის თავმჯდომარესთან, უნგრეთის სახელმწიფო მდივანთან. ასევე ვიზიტის ფარგლებში მინისტრმა საჯარო ლექცია წაიკითხა უნგრეთის საერთაშორისო ურთიერთობათა ინსტიტუტში.