პრემიერ- მინისტრის პრესკონფერენცია დღეს პროტესტის ნიშნად ჟურნალისტმა გელა ზედელაშვილმა დატოვა. ზედელაშვილი ორ გაზეთს წარმოადგენს ეს არის „ალია" და „კვირის ქრონიკა". პრესკონფერენცია დატოვა სააგენტო „ჯი-ეიჩ-ენის" ჟურნალისტმაც. „ჯი-ეიჩ-ენთან" საუბარში გელა ზედელაშვილმა განაცხადა, რომ ეს არის სახიფათო ექპსერიმენტი პრემიერის პრეს-სამსახურის მხრიდან.
„ მე წარმოვადგენ „ალიას" და „კვირის ქორნიკას". დავტოვე პრეს- კონფერენცია იმიტომ, რომ არ მოგვცეს შეკითხვის დასმის უფლებაც კი. მე განმიმარტა მანანა თოქმაჯიშვილმ,ა რომ იმ მედია საშუალებებს, რომლებიც ხშირად სვამენ შეკითხვებს, დღეს ექნებათ შეზღუდული გრაფიკი. მეც გავჩერდი, თუ ეს სხვებსაც შეეხებოდა, ალბათ მერე ყველა ერთად გამოვთქვამდით პროტესტს. არავისაც არ შეხებია, არც ერთ ტელეკომპანიას, არც ერთ გაზეთს.... არჩევნებიდან დაახლოებით სამი თვის შემდეგ, ყველა ჩვენი მცდელობა იბლოკება პრესამსახურის მიერ, კონკრეტულად ნონა ყანდიაშვილის მიერ. ეგ არის მაგის ორგანიზატორი და ეგ აგებს პასუხს. პრესამსახურის რიგითი თანამშრომელი ვერ ამომაგდებდა სიიდან ან სხვას ურიგოდ ვერ ჩასვამდა. რასაკვირველია ძალიან შორს ვარ იმ აზრისგან, რომ ბიძინა ივანიშვილია ამაში ჩარაეული. არა, ეს პრესამსახურის წარმომადგენლები თავად უკმევენ გუნდრუკს და არიდებენ ისეთ ჟურნალისტებს, რომლებმაც შესაძლოა „სახიფათო" კითხვა დასვან. ამით პრემიერს რეალობას აშორებენ და დღევანდელი მათი ასეთი დამოკიდებულებაც იყო ერთგვარი პრევენცია „სახიფათო" ჟურნალისტებისგან დასაცავად. მე ვფიქრობ, ეს ძალიან ცუდია და შეიძლება ცუდ შედეგებამდე მივიდეს", - განაცხადა „ჯი-ეიჩ-ენთან" საუბარში ზედელაშვილმა.
ანალოგიური მოტივით დატოვა პრეკონფერენცია სააგენტო „ჯი-ეიჩ-ენის" ჟურნალისტმაც. პრესკონფერენციის დაწყებამდე მას უთხრეს რომ სიაში იყო 27-ე, თუმცა პრესკონფერენციის დაწყების შემდეგ გაირკვა რომ, ის სააგენტოები თუ გამოცემები, რომლებიც სიაში საერთოდ არ იყვნენ, ათეულში და ოცეულში აღმოჩნდნენ.