ოკუპირებულ აფხაზეთში ჟენევის საერთაშორისო მოლაპარაკებათა თანათავმჯდომარეებმა შეხვედრა გამართეს. ფილიპ ლეფორმა (ევროკავშირი), ანტი ტურუნენმა (გაერო) და ანდრეი დეშიჩამ (ეუთო) შეხვედრა აფხაზეთის ე.წ. შს სამინისტროში გამართეს და მორიგ რაუნდზე განსახილველ საკითხებზე იმსჯელეს. ინფორმაციას ამის შესახებ აფხაზური მედია ავრცელებს.
მათივე ინფორმაციით, ფილიპ ლეფორმა ივნისში დაგეგმილ რაუნდს "პერსპექტიული" უწოდა და იმედი გამოთქვა, რომ ამ შეხვედრაზე "სხვა და სხვა მიმართულებებით პროგრესი იქნება მიღწეული".
აფხაზეთის ე.წ. საგარეო საქმეთა მინისტრმა ვიაჩესლავ ჩირიკბამ აღნიშნა, რომ ქართული დელეგაციის შემადგენლობა მოლაპარაკებებზე შეიცვალა და იმისათვის რომ მათ თემა გაითავისონ დრო სჭირდებათ.
"ჯერ ჩვენ ამას ვერ ვხედავთ. იქ, საქართველოში პრაქტიკულად ორხელისუფლებიანობაა? და ძნელია ელოდო რაიმე სახის მკვეთრ ცვლილებას საკვანძო საკითხებთან დაკავშირებით.
მიუხედავად ამის ჩვენი პოზიცია უცვლელია - როგორც ადრე ასევე ახლა თავდაუსხმელობის ხელშეკრულების გაფორმებას მოვითხოვთ. ეს ყველაზე მთავარი საკითხია, რომლის გამოც ჩვენ მოლაპარაკებებში ვმონაწილეობთ.
აფხაზეთსა და საქართველოს შორის ომი იყო და ეს ომი სამშვიდობო შეთანხმებით უნდა დასრულდეს, რომლის ხელმოწერის შემდეგაც შესაძლებელი იქნება ურთიერთობების ნორმალიზების დაწყება", _ განაცხადა ჩირიკბამ.
სოხუმის შემდეგ, თანათავმჯდომარეთა დელეგაცია თბილისში ჩამოვა, შემდეგ კი ცხინვალში გაემგზავრება.
შეგახსენებთ, რომ ჟენევის საერთაშორისო მოლაპარაკებათა მორიგი რაუნდი 25-26 ივნისს გაიმართება.
