წითელ ხიდზე ნარკოტიკული ნივთიერებების შემცველი მედიკამენტების შემოსვლის ორი შემთხვევა გამოვლინდა. კერძოდ, 11 მაისს, აზერბაიჯანიდან საქართველოში, წითელი ხიდის საბაჟო გამშვები პუნქტის გავლით, "ოპელის" მარკის ავტომანქანით, საქართველოს მოქალაქეები იბრაგიმ ა. და რამილ ა., ასევე აზერბაიჯანის მოქალაქე გულნაზ მ. შემოვიდნენ. შემოსავლების სამსახურის საბაჟო დეპარტამენტის თანამშრომლებმა, ეჭვის საფუძველზე, ავტომანქანა დეტალურად დაათვალიერეს. დათვალიერების შედეგად ავტომანქანაში მოთავსებულ ბარგში სავარაუდოდ ნარკოტიკული საშუალების შემცველი მედიკამენტის - Contramal-ის (საერთაშორისო დასახელება Tramadol HCI) - 8 აბი აღმოჩნდა.
მეორე ფაქტი იმავე დღეს დაფიქსირდა. ს.გ.პ. ,,წითელ ხიდზე" ფეხით მოსიარულეთა დარბაზში აზერბაიჯანის მოქალაქე ჰიჯრან ა. შევიდა. საბაჟო დეპარტამენტის თანამშრომლების მიერ, ეჭვის საფუძველზე, მოქალაქისა და მისი კუთვნილი ხელბარგის დეტალური დათვალიერების შედეგად, ბარგში აღმოჩნდა სავარაუდოდ ნარკოტიკული და ფსიქოტროპული ნივთიერებების შემცველი მედიკამენტები: ტრამალი (ТРАМАЛ 2 МЛ) 2 ამპულა, ტრამადოლი (ТРАМАДОЛ 2 МЛ) 3 ამპულა, რელანიუმი (РЕЛАНИУМ 2 МЛ) 2 ამპულა.
