საქართველოს პრემიერ-მინისტრმა ბიძინა ივანიშვილმა მარჯანიშვილის თეატრში, ოთარ მეღვინეთუხუცესის გამოსამშვიდობებელ პანაშვიდზე განაცხადა, რომ საქართველომ უნიჭირესი და უძლიერესი მამულიშვილი დაკარგა.
"ოთარ მეღვინეთუხუცესი იყო უნიჭიერესი მსახიობი, ასევე, ის იყო უძლიერესი პიროვნება, ძლიერი და ღირსეული მამულიშვილი, რომელსაც ძალიან უყვარდა თავისი სამშობლო და იბრძოდა მისთვის", - აღნიშნა ივანიშვილმა, რომელიც მარჯანიშვილის თეატრში მეუღლესთან ერთად იმყოფებოდა.
შეგახსენებთ, რომ 9 მაისს ხანგრძლივი ავადმყოფობის შემდეგ, 81 წლის ასაკში, მსახიობი ოთარ მეღვინეთუხუცესი გარდაიცვალა. საქართველოსა და საბჭოთა კავშირის სახალხო არტისტი დიდუბის პანთეონში დაკრძალეს.