დღეს, 30 აპრილს აჭარის მთავრობის წარმომადგენლები შუახევის მუნიციპალიტეტში მცხოვრებ 7 ეკომიგრანტ ოჯახს ბინებს გადასცემენ. მათ შუახევის მუნიციპალიტეტის ყოფილი საავადმყოფოს რეაბილიტირებულ შენობაში შეასახლებენ. აღნიშნული ოჯახები „აჭარის ავტონომიურ რესპუბლიკაში სტიქიის შედეგად დაზარალებული ოჯახების შემსწავლელმა სამთავრობო კომისიამ" შეარჩია.
შუახევის მუნიციპალიტეტის ყოფილი საავადმყოფოს შენობის რეაბილიტაცია გასული წლის მაისში დაიწყო. ამ ხნის განმავლობაში ობიექტი საცხოვრებელ კორპუსად გადაკეთდა. შეიცვალა კარ-ფანჯრები, ელექტრო და სანტექნიკის გაყვანილობა და მიწისქვეშა კომუნიკაციები, ჩატარდა მოსაპირკეთებელი სამუშაოები, მოწესრიგდა ეზო და შენობასთან მისასვლელი გზა.
2013 წლის იანვარში რეაბილიტირებულ შენობაში უკვე შესახლდა 31 ოჯახი. სულ შენობა 53 მობინადრეზეა გათვალისწინებული. სოციალური სახლი ეკომიგრანტებისთვის შეიქმნა. აჭარის ჯანდაცვის სამინისტროში შემოსული განცხადებების განხილვისა და შესწავლის შემდეგ სპეციალურმა კომისიამ კენჭისყრა ჩაატარა, რის საფუძველზეც გადანაწილდა ბინები.
