ქუთაისის ციხის ყოფილი მთავარი ექიმი მამუკა მდივანი, რომელმაც თანამდებობა 11 აპრილს დატოვა, სასჯელაღსრულების სისტემაში არსებულ პრობლემებზე საუბრობს. როგორც მამუკა მდივანი გაზეთ „ქრონიკასთან" ინტერვიუში აცხადებს, თანამდებობაზე ახალი ხელისუფლების მოსვლის შემდგომ დაინიშნა, თუმცა სისტემა მალევე დატოვა.
მისი თქმით, პირველი, რაც ქუთაისის ციხეში თვალშისაცემია, არის ის, რომ ვერ გაარჩევ ვინ არის ოფიცერი და ვინ პატიმარი, რადგან ფორმა არავის აცვია. ყოფილი ექიმი ასევე ამბობს, რომ პატიმრისა და ოფიცრის უფლებები ციხეში გამიჯნული არ არის.
„მანამდე სისტემა იყო ძალიან მკაცრი, საშინელებები ხდებოდა, წამება, მისჯილებს ხმის ამოღების უფლებაც არ ჰქონდათ, ახლა გადავარდნენ მეორე უკიდურესობაში, პატიმრები ქმნიან სიტუაციას უკვე ციხეებში, ის როგორც იტყვის ისე უნდა გაკეთდეს და პატიმრის სიტყვას აქვს ოქროს ფასი. გიდასტურებთ სრული პასუხისმგებლობით, რომ მაყურებლები ბრუნდებიან სისტემაში, რაც ძალიან ცუდ შედეგს მოიტანს. ჩემმა კოლეგებმა მითხრეს, რომ შეინიშნება „საერთოს" აკრეფის ფაქტებიც",-განაცხადა მამუკა მდივანმა.
მისივე თქმით, ეს ყველაფერი პირადად სოზარ სუბარისთვისაც აქვს ნათქვამი, თუმცა პასუხად მხოლოდ მისი ანეკდოტი მიიღო.
„სოზარ სუბარი საკმაოდ სუსტი მინისტრი აღმოჩნდა, სასჯელაღსრულებაში ძალიან ცუდი ვითარებაა, ვერ კრებს გუნდს, რომ დაამყაროს წესრიგი. არც გამოცდილება აქვს და არც იცის სისტემა. ეს ისეთი სისტემაა, რომ აქ ადამიანი უნდა იყოს ნამუშევარი, სუბარს რაღაც შეხება ჰქონდა ციხეებთან, ეს არ არის საკმარისი, რომ შეუძლია სასჯელაღსრულების სისტემის მართვა. ეს არის ძალიან სპეციფიკური სისტემა, მე ვიტყოდი, ნახევრად გასამხედროებული, რაშიც პროფესიონალები დამეთანხმებიან,"-აღნიშნავს მდივანი.
