ბათუმის საკრებულოს ფრაქცია "ერთიანი ნაციონალური მოძრაობის" თავმჯდომარე ნოდარ დუმბაძე აცხადებს, რომ მას ავტომანქანის მართვის მოწმობა გააჩნია და სამსახურეობრივი ავტომანქანა არ უნდა ჩამორთმეოდა.
ბათუმის საკრებულოს ინფორმაციით, დღეს საკრებულოს ფრაქცია "ერთიანი ნაციონალური მოძრაობის" თავმჯდომარემ ნოდარ დუმბაძემ სამსახურეობრივი ავტომანქანის დროებით ჩამორთმევასთან დაკავშირებით სპეციალური ბრიფინგი გამართა.როგორც ცნობილია, 12 აპრილს გამოცემულ, ბრძანება N-01/39 მიხედვით ფრაქციის თავმჯდომარეს არ გააჩნია ავტომანქანის მართვის მოწმობა, ამიტომაც მართვის მოწმობის აღებამდე, დროებით უნდა ჩამოერთვას მასზე მიმაგრებული სამსახურეობრივი ავტომანქანა (კია ცერატო-თთშ-329).
თუმცა ნოდარ დუმბაძემ დღეს ჟურნალისტებს 2013 წლის 28 მარტს აღებული მართვის მოწმობა წარუდგინა და ბრძანების გაუქმება მოითხოვა.
ფრაქციის თავმჯდომარის განცხადებას დღესვე, საკრებულოს თავმჯდომარის მოადგილე ვაჟა ვერულიძე გამოეხმაურა, რომელმაც აღნიშნა, რომ ეს არის ტექნიკური ხასიათის ხარვეზი და აღნიშნული ბრძანებიდან გამომდინარე ფრაქცია „ერთიანი ნაციონალური მოძრაობის თავმჯდომარეს" ავტომანქანა მოწმობის წარდგენის შემდეგ ავტომატურად დაუბრუნდება.
