დავით დარახველიძე იმერეთის რეგიონში, კრიტერიუმების შესაბამისად, დევნილთა განსახლების საპილოტე პროექტის მიმდინარეობას გაეცნო. დღეს მინისტრი ქუთაისში იმყოფებოდა და თავად დაესწრო ანკეტირების პროცესს. საუბარია იმერეთის რეგიონში, კერძოდ ქუთაისში, წყალტუბოში, სამტრედიასა და ტყიბულში დევნილებისათვის საცხოვრებელი ბინების განაწილებაზე. მინისტრმა ის შენობებიც დაათვალიერა, სადაც მაისის ბოლოსთვის დევნილები შესახლდებიან.
როგორც მინისტრმა აღნიშნა, ქუთაისში ახალი მშენებლობებიც იგეგმება: „ჩვენს ძირითად ინტერესს წარმოადგენს კრიტერიუმების შესაბამისად დაწყებული საპილოტე პროექტების მიმდინარეობა - კერძოდ ანკეტირების პროცესის გაცნობა. დღეს ამ პროცესს თავად დავესწარი და დევნილებსაც გავესაუბრე. ასევე დავათვალიერე ერთ-ერთი რეაბილიტირებული შენობა, რომელიც ამერიკის განვითარების სააგენტოს დაფინანსებით გარემონტდა. ამ შენობაში ბინას 20 ოჯახი მიიღებს. გარდა ამისა, სამტრედიაში რეაბილიტაცია უტარდება 84 ბინიან ობიექტს, წყალტუბოში მალე დასრულდება 56 ბინიანი 2 შენობა, ტყიბულში კი - 35 ბინიანი ობიექტი. მომავალში კიდევ გვექნება ფართის განაწილების საშუალება. ვფიქრობთ ქუთაისში ახალ მშენებლობებზეც."
როგორც დევნილებმა საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრთან დავით დარახველიძესთან შეხვედრისას აღნიშნეს, ანკეტირების პროცესით კმაყოფილები არიან და იმედი აქვთ, რომ ბინების განაწილება სამართლიანად მოხდება.
რაც შეეხება კრიტერიუმებს, ის იგივე ქულათა სისტემა, რომელიც დევნილი ოჯახის საჭიროების შეფასებისას დაჯამდება. დევნილი, რომელიც მეტ ქულას მიიღებს პრიორიტეტი ენიჭება. სწორედ აღნიშნული კრიტერიუმების გათვალისწინებით მოხდება საცხოვრებელი ბინების განაწილება, იქნება ეს ახლად აშენებული თუ რეაბილიტირებული შენობები.
დევნილთა გრძელვადიანი განსახლების კრიტერიუმების შესაბამისად, იმერეთის რეგიონში მცხოვრები დევნილებისთვის საცხოვრებელი ბინების განაწილება მაისის ბოლოდან დაიწყება, მანამდე კი დევნილები სპეციალურ ანკეტებს ავსებენ. დღევანდელი მდგომარეობით შევსებულია 800-ზე მეტი ანკეტა.
