თბილისის საქალაქო სასამართლოს გადაწყვეტილებით, საზოგადოებრივი მაუწყებლის ყოფილი გენერალური დირექტორი გიორგი ბარათაშვილი თანამდებობაზე აღადგინეს.
აღნიშნული გადაწყვეტილება პირველი ინსტანციის სასამართლომ რამდენიმე წუთის წინ მიიღო. ბარათაშვილი თანამდებობაზე დაბრუნებას ადასტურებს და აცხადებს, რომ ბორდის გადაწყვეტილებას ელოდება.
სასამართლომ საზოგადოებრივი მაუწყებლის სამეურვეო საბჭოს გადაწყვეტილება გიორგი ბარათაშვილის გათავისუფლების შესახებ ბათილად სცნო და ბარათაშვილი გენდირექტორის თანამდებობაზე აღადგინა. ამასთან, მოსამართლის გადაწყვეტილებით, საზოგადოებრივ მაუწყებელს ბარათაშვილის სასარგებლოდ 5 500 ლარის გადახდა დაეკისრა.
გიორგი ბარათაშვილმა სასამართლოში სარჩელი შეიტანა, რომლითაც სამეურვეო საბჭოს გადაწყვეტილების გაუქმების პარალელურად, ახალი დირექტორის თანამდებობაზე გამოცხადებული კონკურსის შეჩერება მოითხოვა.
გიორგი ბარათაშვილი მაუწყებლის სამეურვეო საბჭოს გადაწყვეტილებას ასაჩივრებდა, რომლის საფუძველზეც ის თანამდებობიდან გათავისუფლდა.
