ინტერპოლის თბილისის ბიუროს ინფორმაციით, ამჟამად, გრიგოლ წილოსანი საფრანგეთში, წინასწარი დაკავების იზოლატორშია მოთავსებული და მის მიმართ წინასაექსტრადიციო პროცედურები მიმდინარეობს.

აღნიშნული პიროვნება სსსკ-ს 362-ე მუხლის პირველი ნაწილით (ყალბი დოკუმენტის, ბეჭდის, შტამპის ან ბლანკის დამზადება ან გამოყენება) 2009 წლიდან იძებნებოდა.

ბაღდათის რაიონული სასამართლოს 2010 წლის განაჩენით, სსსკ-ს 182-ე მუხლის მე-3 ნაწილით (მითვისება ან გაფლანგვა) წილოსანს 11 წლით თავისუფლების აღკვეთა მიესაჯა.

2008 წელს ბაღდათის მუნიციპალიტეტის გამგებელ დავით გუმბერიძეს და შპს „მაგი"-ს დირექტორ გრიგოლ წილოსანს შორის ქ. ბაღდათის №2 საჯარო სკოლის კაპიტალური შეკეთების სამუშაოების შესრულებაზე ხელშეკრულება გაფორმდა, რომლის ღირებულება 90 800 ლარს შეადგენდა.

გრიგოლ წილოსანმა თანხის მითვისების მიზნით, მხოლოდ 49 020 ლარის სამუშაოები შეასრულა, ხოლო დანარჩენი თანხა - 41 780 ლარი მიითვისა და ხელშეკრულებით გათვალისწინებულ ობიექტზე სამუშაოთა წარმოება არ დაასრულა, რითაც სახელმწიფოს დიდი ოდენობით ზიანი მიაყენა.