ექსპერტი კავკასიის საკითხებში მამუკა არეშიძე მიიჩნევს, რომ ლოპოტას ხეობაში, სოფელ ლაფანყურთან ჩატარებულ სპეცოპერაციასთან დაკავშირებით, წინა ხელისუფლებამ თავისი უსუსურობა უნდა აღიაროს. როგორც მან "პრაიმ-ტაიმის" პრესკლუბში აღნიშნა, ბუნებრივია, ჩნდება კითხვა იმის შესახებ, თუ რატომ უნდა იყოს დროებითი საგამოძიებო კომისია მაშინ, როცა არსებობს საპარლამენტო საგამოძიებო კომისია.
მისი თქმით, საზოგადოების ინტერესებიდან გამომდინარე, შესაძლებელი იყო საგამოძიებო ორგანოების მხრიდან გარკვეული, ფრაგმენტული ანგარიში წარდგენილიყო.
"მქონდა შეხვედრა ორიგვე მხარესთან, ვინც უშუალოდ არიან ჩართულები ამ საქმის გამოძიებაში. საქმე გვაქვს პროფესიონალ და კეთილსინდისიერ ადამიანებთან, თუმცა არიან ადამიანები, რომლებიც ცდილობენ ეს საქმე არ იქნას გამოძიებული. ვგულისხმობ ყოფილი ხელისუფლების წევრებს, რომელთა ნაწილიც ისევ მუშაობს საგამოძიებო ორგანოებში. ამიტომ გაიწელა ეს საქმე", - განაცხადა არეშიძემ.
მისი თქმით, ლაფანყურის სპეცოპერაცია წინა ხელისუფლების იმიჯზე შავი ლაქაა, ისეთი ლაქა, რომლის ჩამორეცხვაც ძალიან ძნელია.
არეშიძის განცხადებით, სპეცოპერაციის დაგეგმვაში ისეთი რამ მოხდა, რომელმაც დეზორგანიზაცია გამოიწვია.
"ახლა იძულებულები არიან ეს ყველაფერი დაფარონ. ამიტომ, ცდილობენ საქმეს გაემიჯნონ. ავიწყდებათ, რომ ამ სპეცოპერაციის მონაწილე ცოცხალი ხალხია, რომლებიც შეიძლება საგამოძიებო ორგანოებში არ დადიან, მაგრამ ამ ყველაფერზე საზოგადოებაში საუბრობენ და ჩვენ მათთან შეხება გვაქვს", - განაცხადა არეშიძემ.
მისივე განმარტებით, წინა ხელისუფლებამ მარტიდან დაგეგმა ოპერაცია, რომელიც გარკვეულ მიზანზე იყო გათვლილი, თუმცა რაზე ამის დასახელება უჭირს.
არეშიძის თქმით, რაღაც მოხდა, ამიტომ სპეცოპერაცია 28 აგვისტოს ჩატარდა.
"შეიძლება ეს უნდა გამოეყენებინათ არჩევნების ჩასაშლელად, ან შეიძლება სხვა რამისთვის, მაგრამ ეს ყველაფერი ვარაუდია და დოკუმენტური დასაბუთება არ აქვს. სხვა რაღაც იყო ჩაფიქრებული და სხვაგან წავიდნენ. თუ ის ყველაფერი ტყუილია, რასაც სახალხო დამცველი და საზოგადოება საუბრობს, გამოდის, რომ მაშინ ქვეყანას საგამოძიებო ორგანოები არ ჰყოლია და შეიარაღებული ჯგუფის გადაადგილება ვერ შეამჩნიეს", - აღნიშნა ექსპერტმა.
მისივე განცხადებით, ყოფილმა ხელისუფლებამ ან უნდა აღიაროს თავისი უსუსურობა, ან საზოგადოებას დაეთანხმოს.
